Lahi og tinagdan

Have a good day. I hope you are always in good health.

Gusto unta ko nga magpatambag nimo because I really have a very big problem. Gusto lang unta nako nga masabtan ang tanan tungod kay naglibog ko niining akong amahan.

Lahi man god ang akong amahan og tinagdan diri nako. Halos di gyod siya motagad nako, Tita Salie, kun magkita mi. Dili sama sa ubang amahan nga sweet kaayo ngadto sa ilang mga anak.

Kanunay pod kung tungohon sa akong amahan ug dili pa igo iya kong tawgon nga oplok. Di ba sakit man kaayo ning  mga pulonga, Tita? Dili nako masabtan tungod kay amahan nako ang motawag nako niini. Nga unta siya man ang molaban nako kun dunay motawag nako og dili maayo. Usahay makaingon ko nga “makabawos ra ko ninyo.” Apan dili gyod nako mabuhat ang pagpanimalos.

Palihog pasabta ko, Tita Salie, ug sultihi ko kun unsay angay nakong buhaton. Daghang salamat.

* * *

Maayong adlaw,

Bisan ingon niana ang imong amahan, ayaw intawon tinguhaa ang pagpanimalos ngadto kaniya. Hinuon maoy tinguhaa nga iyang makit-an ang imong kaayo.

Paningkamot pag-ayo sa imong kinabuhi, aron magmalampuson ka ug imong ipamatuod ngadto kanila nga sayop sila sa ilang gituohan. Pasagdi sila nga makaamgo nga sayop ang ilang pagbiay-biay kanimo.

Himoa nga dakong hagit sa imong katakos ang ilang gipanulti parti nimo. Ug paningkamoti nga adunay bunga nga ilang makita aron mausab ang ilang pagtan-aw kanimo. Ayaw panumbalinga ang ilang masakit nga estorya tungod kay kun magpaapekto ka dili ka makapadayon sa imong mga tinguha ug makaingon na hinuon ang imong amahan nga husto gyud siya -- Tita Salie