Isla Paraiso

Gula 154

“May gisulti ang madre superyor kanako bahin kanimo,” ni Padre Judas pa. “Tinuod ba kini sister Veronica?”

Wala’y tubag.

“Nganong nakahukom ka man paggawas sa kombento, sister Veronica?” Gitumbok na gayod ni Padre Judas ang punto nga buot niyang tukbilon. Wala na siya magpaliko-liko aron mahatagan na siya’g katin-awan sa madre.

“W-wala ako masayod kun unsaon ko ikaw pagpasabot niini, Padre,” ni sister Veronica pa. “Apan may pagbati ako nga ingon sa dili gayod ako angay ning kalibotan nga ako karong gisudlan.”

“Segurado ka na ba sa imong desisyon?” Laing pangutana ang gipasupot sa pari.

Kahilom.

“Abi mo, sister Veronica,” namulong si Padre Judas taliwala sa kahilom sa madre,” “dili ko buot nga sabton mo nga nagpanghilabot ako sa pribado mong kinabuhi. Buot lang kong makatabang kanimo kun gikinahanglan mo ang akong panabang.”

Wala gihapoy timik si sister Veronica.

“Buot kong masayod kun fixed na ba gayod ang imong hukom,” mipadayon si Padre Judas.

“Oo, Padre,” ni sister Veronica pa. “Bug-os na ang akong hukom. Ug dili na kini malubag pa bisan unsay mahitabo.”

“Apan unsa may hinungdan nga nakahukom ka man og ingon niana?” Laing pangutana sa pari nga mitutok pag-ayo kaniya. -- Sumpayan pa