Isla Paraiso

Mibati og kawili si Padre Judas kang sister Veronica. Usa kini ka mapuslanon nga materyal sa Orchids Sister’s Convent. Kun unsa may nakapausab sa hukom ni sister Veronica nga maoy hinungdan sa pagluwat sa bokasyon niini, kana maoy iyang sutaon pag-ayo. Tinuod nga gisuginlan na siya sa madre superyor sa nahitabo. Apan buot siya nga makigsulti kang sister Veronica. Buot niya kining pugngan sa paggawas sa kombento.

Pagkabuntag, human sa pamahaw, nakit-an ni Padre Judas si sister Veronica didto sa tugkaran sa kombento. Nalingaw kini sa pagpanakop sa mga alibangbang nga nanugok sa mga bulak sa harden.

Giduol sa pari ang maanyag nga madre. Wala kini makamatikod sa iyang pagduol. Ang pagtagad niini didto ra gayud sa mga alibangbang.

“Sister Veronica,” gihinay niya’g sangpit ang madre.

Si Sister Veronica nahalingi pagkalit ug pagkakita niini kaniya, midalit kini’g usa ka mahigalaon nga pahiyom. “Good morning, father Judas,” mitimbaya ang madre kaniya.

“Good morning,” balos timbaya sa pari. “Wa ba ako makatugaw sa imong pag-inusara dinhi?” “Wala man,” laktod nga tubag sa madre.

“Kumosta ka na man?”

“Okey lang.”

“How is your spiritual life?” Gipaladman na ni Padre Judas ang iyang pangutana pagkamatikod nga taphaw ang tinubagan ni sister Veronica. -- Sumpayan pa