Giuhaw ako

Sulod sa usa ka naglinyang kuwarto- mga cottage sa Tabing Dagat Beach Resort, puguso kaayong gihamag ni Rey si Linlin nga iyang kumare.

“Hagbay pa akong nangindahay nga maangkon ka, Mare Lin! Maayong pagkagalam sa bigot mong lawas...!”

“Salamat, Pre Rey! Si Pare Henry nimo, wa na gyu’y pagpakabana nako, uy! Himabaye kaayo si Henry! Lipay ko, Pre Rey, nga ikaw nay makatambal sa akong kauhaw...!”

“Maayo kay wa ko nimo balibari nga magdeyt ta atol ning adlaw sa Biyernes Santo, Mare Lin...!” “Kuyawan lang ko ni Mare Gemma, imong asawa, Pre Rey! Tingali’g maatikan ta ning atong pag-iring-iring...!”

“Dugay na nga wala na nako matandog ang akong asawa, Mare Lin! Pukos kaayo si Gemma sa among dakong groseri nga tindahan sa Carbon Market. Ngita ko’g laing putahe! Si Pare Henry, seguroa sab nga di kamatikod ning atong pag-iring-iring sugod ning adlawa...!”

“Bahala na’s Henry, Pre Rey, uy! Tsikboy sab kaayo parehas nimo. Importante nga tagbawon ko nimo ron. Nananghid ko ganiha ni Henry nga mag-Station Of The Cross ko’s Banawa...!”

“Sus, bus-oka pa kaayo sa lawas mo, Mare Lin! Tambalan ko karon ang imong kauhaw...!”

Pipila ka gutlo, gitagbaw dayon nila ni Rey ug Linlin ang ilang kaugalingon sa huygo-todong-romansa sa sulod sa cottage. Sa tupad nilang cottage, may lain na usab nga paresan nga bag-o lang misulod kay mabati man ang pag-abli sa pultahan. Nakapanglingo si Rey human sa taudtaod nilang kumbati ni Linlin ibabaw sa kama. Nakatulog sa katagbaw ang iyang kumare.

Mitingkag ang dunggan ni Rey nga klarong nakadungog sa panagsulti sa bag-ong paresan nga misulod sa tupad nga cottage. Lawanit lang ang bungbong sa cottage, maklaro kaayo ang panagsulti sa  tawo didto sa tupad lawak niini. Sinati ni Rey ang tingog sa duha sa tupad nga kuwarto.

“Uhaw gyud ko, Pre! Dugay nang panahon nga wa na ko tagda sa akong bana.

“Sus, Lamia gyud nimong syapulon, Mare, uy! Ayaw kabalaka, tagbawon tika....!”

Nahaugnok si Rey. Tingog ni Gemma, nga iyang asawa ang anaa sa pikas kuwarto ug kauban sab niya si Pare Henry, ang bana ni Linlin! Wa makasabot si Rey sa iyang gibati nga mipasiklap sa nakatulog nga si Linlin. Misamot ang kagil-as sa gibati ni Rey, dihang maoy sunod niyang  nadungog sa pikas kuwarto ang hangos ug agumod sa duha ka binuhat sa tupad nga cottage.

“M-Mare Gemma! Lamia gyud nimo, uy! M-Mare Gem....!” “Oh, Pre Henry! Tagbawa ko...! P-Pre Hen....!”

Nasugmoy si Rey. Daw nanagingting karon sa iyang pandungog ang tuaw sa mga pulong “Giuhaw Ako...”, apan dili gikan sa mga ngabil sa Manunubos nga nagtinga nga nagdupang gilansang sa krus atol sa kasaulogan sa Biyernes Santo, kun dili, gikan nilang pulos makasasala nga naglublob karon sa tagsatagsa ka kuwarto, sa sulod sa cottage. (Kataposan)