Rockets hagsasa Lakers

CEBU, Philippines - Nahimong mabungahon ang coaching debut ni Luke Walton sa Los Angeles ug angayan siya magpasalamat og daku ni Fil-Am Jordan Clarkson nga mikadlit og 12 sa iyang 25 puntos sa katapusang kuwarter aron pag-aswat sa Lakers ngadto sa 120-114 nga kadaugan batok sa Houston Rockets sa ikaduhang adlaw sa aksiyon sa 2016-17 NBA season kagahapon didto sa Staples Center.

Si D’Angelo Russell miposa og 20 puntos ug si Julius Randle midugang og 18 puntos, pito ka rebounds ug unom ka assists alang sa Lakers nga misulbong ngadto sa maayong sinungdanan sa ilang season nga wala na si Kobe Bryant. Daku sab og natampo ang bag-o nilang batos nga si Timofey Mosgov nga kanhi sakop sa NBA champion team Cleveland Cavaliers human ang Russian nga sentro midonar og 12 puntos ug walo ka rebounds.

Ang 3-pointer ni Clarkson maoy nakapalabaw sa Lakers sa hingpit, 116-112  sa nahabilin nga 1:48 sa duwa. Misamot pa ang kalbaryo sa Rockets gumikan kay wala sila makapasud sa ilang mga open shots sa daginutong oras nga nahabilin.

Si James Harden miratsada og 34 puntos uban ang career-high 17 assists ug walo ka rebounds alang sa Rockets nga wala dayon maabiba sa bag-o nilang coach nga si Mike D’Antoni. Apan namugnaw si Harden sa katapusang kuwarter diin sayes puntos ra ang iyang nahimo ug nakapasud lamang sa usa sa lima niya ka tirada.

Sa laing bahin, bisan og wala na sa ilang poder si Kevin Durant, maayong sinugdanan ang giladlad sa Oklahoma City Thunder human ilang gibuntog ang Philadelphia 76ers, 103-97  ubos sa pagpangu ni Russell Westbrook nga miayag og 32 puntos uban ang 12 ka rebounds ug siyam ka assists. Gikompleto ni Westbrook ang iyang pagkamabayanihon human siya mipasud og duha ka free throws nga maoy nakabuak sa 97-97 nga panagtabla sa nahabilin nga 35 segundos.

Miabag ni Westbrook mao sila Enes Kanter nga mihipos og 17 puntos ug 12 ka rebounds ug si Steven Adams nga mitampo og 16 puntos.

Nangu sa pilderong Sixers mao si Joel Embiid, nga mitapos og 20 puntos ug pito ka rebounds. (BANAT NEWS)