Katagbaw sa teknolohiya

Makapakugang ang bag-ong survey nga nigawas nga 65% sa kapin dos mil ka tawo nga gipaubos sa usa ka pagtuon pabor nga maghimo sila og sex video kauban ang ilang hinigugma gamit ang cellphone.

Makapaalarma ang maong matang sa pagtuon nga gihimo dinhi sa Pilipinas. Kon ingon niini ang kalidad sa panghunahuna sa mga tawo kabahin sa teknolohiya nga iyang gipanag-iya karon, pagka dakong alaot sa kalamboan nga ato unta nga kapahimuslan.

Ug sa kadaghan sa mga tawo nga nanag-iya sa teknolohiya karon, makapabalaka kon giunsa na paggamit ang mga butang nga nahimo ning bag-ong henerasyon.

Sa kadaghan sa mga positibo’ng hatud sa teknolohiya, di’ ikatago nga naabusohan na kini sa henerasyon karon. Didto sa kaulohan, nabaniog ang pagpatay sa usa ka 15 anyos nga nakighigala og minyo pinaagi sa Facebook. 

Bisan kon nahibawo na siya’ng adunay kabilinggan ang lalaki, wa’ siya makigbuwag ug hinuon niuban pa sa lalaki. Tungod sa kalagot ug hulga sa pamilya sa babaye nga ilang kasohan ang lalaki, nahitabo ang gikahadlokan sa tanan.

Gipatay ang batan-on ug gilabay ang iyang patay’ng lawas.  Giangkon sa lalaki ang salaod.

* * *

Sa Estados Unidos, kapin 200 ka tambalanan didto ang gikawatan sa mga “hackers” og mga medical file nga naglambigit og 4 milyones ka pasyente. 

Bisan kon wa’ pa masayod ang otoridad unsay tumong sa mga hackers apan mensahe sa mao nga insidente nga mahimo ra diay nga masu’d bisan ang mga sensitibo’ng files. 

Nahitabo na ‘sab ang susamang insidente dinhi sa Pilipinas nga gisu’d sa mga hacker ang file sa mga ahensya sa gobiyerno. Kon nahimo nila ang pagkawat sa maong mga files, di’ imposible nga mahimo nila ang paghimo’g kadaot aron paglawgaw sa proseso gamit ang teknolohiya.

Daghang positibo’ng hatud ang teknolohiya nga padayon nato nga napahimuslan karon. Apan sa matag positibo’ng aspeto nga hatud niini, adunay mga negatibo’ng tampo ang gadget nga atong gihuptan.

Nagpasabot lang nga ning mao nga kalibutan, wa’y perpekto’ng butang nga adunay perpekto’ng ikadalit kanato.

Sa katapusan, dako gihapon ang importansya sa personal nga komunikasyon, pag-amping sa usa’g-usa, pagsabot ug pagpasabot sa uban, pagtahod sa katungod sa ubang tawo, pagpaambit og impormasyon nga makatabang ug makapalambo, pag-umol og mga ideya ug paagi nga gikan sa kinauyokan sa panghuna-huna ug pagrespeto sa uban bisan kon ang wala pa makahupot sa bag-ong teknolohiya.

(Email: [email protected]. or [email protected].)