Tindero’g ampao ug driver, sikop
Niño Alcantara: Move over, Roger Federer!
CEBU, Philippines - Dul-an usa ka milyon ka pesos nga balor sa ilegal nga drugas ang nasakmit sa mga otoridad atol sa nagkalain-laing operasyon sa mga kalungsuran sa Lalawigan sa Sugbo.
Nadakpan sa mga sakop sa PDEA-7 ang usa ka High Value Target (HVT) ug usa nga anaa sa drug watch list sa Sitio Siervas, Brgy. Poblacion sa Dakbayan sa Carcar kagahapon sa kaadlawon. Ang suspek nga si Glenn Alcoseba, nakuhaan og usa ka bulto sa gidudahang shabu nga motimbang og 55 gramos ug mobalor og P275 mil. Matod sa tigpamaba sa PDEA-7, Leia Albiar nga nibutyag kanila si Alcoseba nga gikan sa Bilibid ang ilang supply. Apan gihimakak kini sa dinakpan kay igo ra siyang naninda og chicharon ug ampao. Nasikop sab ang usa ka HVT sa Brgy. Bagacay sa Lungsod sa Sibonga. Giila ang dinakpan nga si Geofry Sabayton uban ang iyang kakunsabo nga si Adolfo Dela Cruz. Nakuhaan sila og napulo ka pakete sa gituohang shabu nga mobalor og P200 mil.
Nadakpan ang numero 1 sa watchlist sa Alegria Police Station nga si Vivencio Jamero, alyas Pugo atol sa buy-bust operation sa may Alangasil sa Brgy. Madredijos. Nakuhaan kini og duha ka putos sa gituohang drugas. Sa laing drug operation nga gihimo sa Lapu-Lapu City Police Office, nasikop sila si Albert Araneta ug Kit Angel Astillero nga taga New Paradise, Brgy. Pajo. Nakuhaan sila og 25 ka gagmay’ng pakete sa gituohang shabu. Nadakpan usab sa Sitio Talong, Brgy. Cogon sa Lungsod sa Cordova ang bata-bata sa HVT nga si Felipe Tugonon alyas Yulo. Samtang nakasibat ang iyang amo nga si William Sumalinog. Nasakmit gikan kang Tugonon ang 9 ka gagmay’ng pakete sa gituohang shabu ug P200 nga marked money. Sa Dakbayan sa Toledo, nasikop sa kapolisan ang usa ka traysikol drayber sa Brgy. Talavera.
Nadakpan si Benjie Mago kinsa nakuhaan sa iyang posisyon og 6 ka gagmay’ng pakete sa gituohang shabu, kwarta ug marked money. Nasikop sab sila si Wilton Tumakay ug Reynaldo Macapobre nga taga Brgy. Cantabaco human nasakpang nanuyop. Nasakmitan sila og drug paraphernalia.
Samtang adis-adis nga nipalit og ginadiling drugas, nasikop sa kapolisan sa Talisay sa Sitio Tunga, Barangay Tanke. Ang dinakpan mao si Richard Cabrera ulitawo nga nagpuyo sa maong dapit.
Gikatakdang pasakaan og tukmang kaso karong adlawa ang mga dinakpan. - Camille L. Pateres, Romeo T. Limpangog, Rowena D. Capistrano, Raymond D. Abarcas ug Gabriel C. Bonjoc/DILT) (BANAT NEWS)
- Latest
