P6M shabu, mga armas nasakmit

CEBU, Philippines - Kapin sa usa ka kilo nga shabu, mga high powered nga armas ug mga rifle grenade ang nakuha sa mga sakop sa Philippine Drug Enforcement Agency (PDEA)-7 atol sa buy-bust operation diha sa Katipunan Street, Brgy Labangon ning Dakbayan sa Sugbo  niadtong nakalabay nga gabii.

Atol sa maong operasyon duha ka mga lalaki nga gikatahong armado ang nasikop sa mga operatiba apan wala nadakpan ang leader sa maong grupo nga si Joshua Bucog.

Ang duha giila nga sila si Roy Estrera, 38, alyas Babz, taga Brgy Guadalupe ug Erwin Anthony Abellana, 40, taga Brgy Sambag II.

Si PDEA-7 Dir. Yogi Ruiz miingon nga gikan pa niadtong bulan sa Nobiyembre  nila nga gipanid-an ang maong grupo tungod sa report nga nalambigit sila sa ilegal nga drugas.

Matud pa ni Ruiz  aduna silay report nga nalambigit sab sa gun for hire ang maong grupo maong magkinto gyud ilang mga kostumer.

Narekober sa taga PDEA-7 ang usa ka .45 colt caliber, usa ka cal. 9mm Ingram, upat ka  40mm rifle grenade, mga bala sa .45 pistol ug .9mm pistol.

Nakuha sab nila ang laing dagkung putos sa mga shabu, timbangan ug mga drug paraphernalia.  Miabot sa 1,600 gramos ang shabu nga nakuha diin kini nagkantidad og P6, 360, 000.

Sa laing operasyon, tulo ka gidudahang pushers ang nasikop sa buy-bust operation diha sa Sitio Crossing, Brgy Poblacion, Lungsod sa Cordova nga giilang si Rey Pacaldo Cuizon, 51, taga Brgy Day-as sa maong lungsod.

Apil sa nadakpan sila si Tomaquin Escabas, 28, ug Ramil Mercadal Dalcullo, 37, nga nakuhaan usab og 34 ka gagmay nga paketeng shabu.

Samtang sa Toledo City  upat  ka mga lalaki ang nadakpan ug nasakmit ang mga gidudahang shabu sa buwag nga anti illegal drugs operations sa Dakbayan sa Toledo.

Ang mga nadakpan mao sila si Jovelito Macapobre alyas Bahala, 22, Randy Navarro, 27, Reynaldo  Baricuatro 31,  ug Vendri Enriquez 35.

Ang mga suspek nasakmitan og mga pinaketeng shabu, drug paraphernalia ug buy-bust money.  Jojo Ugdol, Rowena Capistrano ug Raymond D.  Abarcas (BANAT NEWS)