Cignal tinambakan ang Blustar

MANILA, Philippines - Nakabangon ang Cig­nal-San Beda sa masa­mang panimula bago itakas ang 109-79 panalo laban sa Blustar Detergent upang makuha ang ikaapat na panalo sa 2017 PBA D-League Aspirants’ Cup kahapon sa Pasig City.

Binanderahan ni Ro­bert Bolick ang Hawkeyes nang pasabugin nito ang 15 puntos para hatakin ang kanilang tropa sa ikalawang puwesto tangan ang 4-1 marka kasama ang Cafe France na may parehong rekord.

Nagdagdag naman si Byron Villarias ng 15 puntos mula sa 3-of-6 shooting clip sa three-point range.

“We tried to give e­verybody a chance to start. We played well in the first quarter, but the problem was we’re not ma­king our shots,” ani Cignal coach Boyet Fernandez.

“Credit to the boys who played in the end of the second quarter and really played defense. They really wanted to play and that’s where the lead extended to 14,” dagdag nito.

Nangibabaw sa hanay ng Blustar si Tristan Perez na kumana ng 29 puntos at tatlong rebounds gayundin si Jason Melano na may 15 markers at limang boards.

Gayunpaman, hindi ito sapat para sa Dragons na lumasap ng ikaapat na sunod na kabiguan.

Sa unang laro, ginulantang ng Victoria Sports-MLQU ang Jose Rizal University, 76-66 para masungkit ang unang panalo.

Nagbuhos si Robbie Herndon ng 22 puntos tampok ang walo sa fourth quarter para sa Victoria Sports.

May double-double naman si Aris Dionisio hawak ang 20 markers, 13 boards, at apat na blocks samantalang nagsumite si Chris Bitoon ng 12 puntos, apat na assists at dalawang rebounds para suportahan ang Victoria Sports.