Seigle mohimo katapusang hunat sa PBA

CEBU, Philippines - Taas na ang iyang pangedaron, apan ang beteranong Fil-American nga si Danny Seigle misaad nga    ihatag ang tanan niyang ikabuga sa posibleng katapusan niya nga season sa PBA.

Si Seigle, 40-anyos, gihatagan og kahigayonan sa TNT KaTropa dihang gilakip siya sa final line-up sa koponan  sa 42nd season sa PBA nga buksan sa Domingo didto sa Smart Araneta Coliseum.

Si TNT team manager Virgil Villavicencio ang miprangka ni Seigle nga plano sa koponan nga mopabata sa ilang line-up pangandam sa kaugmaon sa TNT  hinungdan nga dili na angay mahibong si Seigle nga dili na unya siya makuha sa koponan sa umaabot.

Si Seigle mao ang ikaupat nga player sa PBA nga moduwa sa sunod season nga nagpangedaron og 40-anyos pataas. Uban niya sila si Asi Taulava sa NLEX, Mick Pennisi sa GlobalPort ug Jayjay Helterbrand sa Ginebra.

Ang 1999 “Rookie of the Year”nga si Seigle nagkanayon nga grabe iyang preparasyon alang sa sunod season ug  giatiman niya ang iyang kondisyon aron makalahutay siya batok sa mga batan-ong bigman sa liga. (BANAT NEWS)