EDITORYAL - Libog nga sistema

Makalibog kining sistema sa gobiyerno, sama niining modernisasyon kuno sa sistema sa transportasyon. Gusto nila nga bag-ohon ang matang sa transportasyon, apan nagpabilin gihapon ang Land Transportation Office ug Department of Transportation sa kinaraan nilang mga patakaran. Nauso na karon kining gitawag og Uber ug Grab taxi services dinhi sa Pilipinas ug kon itandi ang mga taksi sa Uber ug Grab pwerte kalayo sa deperensya.

Sa taksi, maatangan ra sa dalan apan kon demalason ang pasahero, bastos ug lago ang drayber, o ba kaha baho ang sulod sa taksi nga ilang masakyan. Apan sa Uber ug Grab, bisan tua pa sa kasilyas ang pasahero, makasiguro g’yud kini nga makasakay og hamugaway nga sakyanan kay ma-book ra man pinaagi sa apps sa ilang mga selpon ang Grab o Uber. Nagka moderno na karon ang mga pasahero, mas ganahan sila nga ang baylo sa ilang kuwartang gipleti, bugtian og maayong serbisyo.

Ang uban naengganyo og sakay og Grab o Uber kay adunay mga promo, limpyo ang sulod ug gawas nga bahin sa sakyanan, ug dili baho ug lago ang drayber.

Kining mga taksi, unsa man kaha ang ilang ikatanyag nga labaw sa mahatag sa Uber ug Grab? Pirme lang gani sila nga magreklamo nga mahal ang petrolyo. Unsa man diay ang gigamit sa Uber ug Grab, tubig?

Ang gusto sa LTO ug DoTr nga pakuhaon og prangkisa ang mga tag-iya sa pribadong sakyanan nga gihimong pasaheroan. Lisud man ni kay daghan kanila dili man g’yud full time nga namasahero. Ngano nga dili na lang kaha ang ahensiya sa gobiyerno maoy mo-adjust para mahimo nga legal kining maong matang sa pasaheroan nga maoy mas gusto karon sa mga sumasakay? Dili ba ang interes sa kinabag-an ug dili sa pipila lang ka monopoliya sa negosyanteng taxi operators ang angay’ng hatagan og mas dakong bili? Moderno na man kaha karon ang Pilipinas? Ngano nga dili man mag-moderno ang sistema?