EDITORYAL – Vigilantes ug frat gangs

Mora na unta tong naundang ang pagpamatay ala-vigilante apan nahibalik nasad kini. Hapit nasad kada adlaw ug gabii dunay patyon vigilante style.

Ang mga badlongong sakop sa mga notoryus nga fraternity dili sad palupig sa mga vigilante. Sige sad ang ilang mga dugoong kalihukan.

Sayud ba mo nga tungod niining mga gitawag tang vigilante ug mga badlongong fratmen daghang mga estudyante nga gikan sa laing mga lalawigan ang wala na patunghaa dinhi sa Sugbu sa ilang mga ginikanan?

Usa ka cattle rancher sa Northern Mindanao misulti sa Banat News nga iyang gipapauli sa ilang probinsya ang duha niya ka lalaking anak nga nagtungha dinhi tungod sa kabalaka nga basin matripan kini sa mga armadong bugoy nga sakop sa mga notoryus nga fraternity dinhi sa ato.

Matud niya dili kay siya ra ang nipapauli sa iyang anak tungod sa giingong vigilante ug criminally-inclined fratmen. “Naa pay ubang mga ginikanan nga akong kaila,” suma pa ning maong cattle rancher.