Brgy. Yati, liloan, cebu

“Kining eskina dapit sa may gasolinahan trapik kaayo hapit kada adlaw tungod sa gipang-parking nga mga sakyanan. Unya naa pa gyuy shop diha nga ang gitrabaho nilang sakyanan naa ra sa kilid sa karsada, hasol kaayo sa mangagi.”

Brgy Poblacion, Borbon, Cebu

“Wala man gyuy nangolekta sa basura diri sa among lugar, mangabaho na lang ang uban kay bisa’g asa lang ibutang. Asa na man ang ilang giingon nga kausaban sa among lungsod, mao ba kini ang wa’y atiman sa pagkuha sa mga basura?”

Brgy Duljo-Fatima, Cebu City

“Duda lang ko sa mga polis kay sige sila og pang-ronda diri sa among lugar tungod sa shabu pero naay ilado kaayo nga pusher diri agi-agian ra man nila. Imposible kaayo kun wala sila kaila kay gironda man gani nila ang ginagmay lang nga pusher, kini pa kaha nga suki man ni sa mga tricycle drivers.”

Brgy South Poblacion, San Fernando

“Naa lang ko’y ireklamo bahin niining usa ka poultry farm diri sa among lugar kay daghan kaayong mga langaw. Ang nakapaet kay tapad ra niini ang among balay unya kun mag-spray sila’g medisina makapanimaho gyud mi, kuyawan intawon ang mga tawo diri basin og magkasakit.”

Brgy Basak-San Nicolas, Cebu City

“Diri sa Sitio Kalubihan, luyo sa kapilya, kay daghan kaayo ang moparking. Hapit mapuno ang karsada sa mga sakyanan ug maglisod na intawon sa pag-agi ang mga tawo, samot na ang mga fire trucks kun simbako naay sunog.”

Brgy Ermita, Cebu City

“Nagsige na intawon ko pagreklamo sa mga polis bahin niining  sugal nga hantak ug baraha diri sa among lugar pero hangtod karon wala man gyuy aksyon. Saba ra ba kaayo kining mga sugarol bisa’g kaadlawon na.”

Brgy Sawang-Calero, Cebu City

“Dunay namaligya’g shabu dapit sa luyo lang sa Police Station 6, unya naa pa gyuy silingan nga polis pero wala man gyud dakpa kining tawhana? Unsa diay gibuhat sa mga polis, maghuwat lang kun dunay talay?”

Brgy Inayawan, Cebu City

“Hangyo lang ko nga laing unit lang sa mga polis ang parondahon sa mga video karera diri sa among silingan sa Sitio Lumboy kay naa mi makit-an nga polis sa Pardo nga mag-arian pero dili man dakop ang tuyo.”

Brgy Pooc, Talisay City

“Naunsa na man kining among barangay nga wala man magpakabana sa naghitak nga ilegal nga drugas. Hasta ang nagdala sa peace and order diri, wala gyuy nahimo para pagsulbad sa problema sa among barangay.”

Alang sa inyong mga reklamo, text lang sa 09083006702