Pilipinas ang dapat may monitor station
NU’NG 2016 ibinasura ng UN Permanent Court of Arbitration ang “nine-dash” boundary ng China sa buong South China Sea. Ibinawal din ang pag-angkin ng Beijing sa Panatag Shoal. Lima ang mahahalagang pasya:
l Walang “historical rights” ang China sa ilalim ng UN Convention on the Law of the Sea;
l Nasa 200-mile exclusive economic zone ng Manila ang Panatag;
l Tradisyunal na pangisdaan ng maraming bansa ang Panatag;
l Nilabag ng China ang karapatan ng Manila sa bahura sa SCS;
l Winasak ng China ang kalikasan dahil sa island reclamations.
Itinatwa ng Beijing nu’ng Marso ang planong environment monitoring station sa Panatag. ‘Yon ay matapos magmalaki ang Communist Party sa Shansa, ang munisipyo sa Hainan na nangangasiwa ng “nine-dash” claim, sa Hainan Daily ng gobyerno, na tatapusin ang radar station sa loob ng 2017.
Kung tutuusin, Manila ang dapat mag-istasyon ng enviroment monitor sa Panatag. Hurisdiksiyon ng Pilipinas ang bahura batay sa kasaysayan; tungkulin ng Pilipinas ang kalikasan doon sa ilalim ng UNCLOS; dapat protektahan ng Manila ang pangisdaan para ibahagi sa ibang bansa, base sa pasya ng UN court.
Dapat patrolyahan ng Philippine Coast Guard at ng Bureau of Fisheries and Aquatic Resources ang Panatag, laban sa mapanirang pangingisda ng sinoman. Wakasan na ang pag-aani ng mga Hainanese ng endangered pawikan, taklobo, at fan corals doon. Batay sa satellite photos nu’ng 2013-2015, sa kontrol ng Beijing, tatlo sa bawat apat ng 15,000-ektaryang lagoon ay winasak na. Mapanirang pangingisda ang dahilan kung bakit sinita ng Philippine Navy simula’t-sapol ang mga Hainanese nu’ng 2012. Pero biglang inagaw ng Beijing ang Panatag.
* * *
Makinig sa Sapol, Sabado, 8-10 ng umaga, DWIZ (882-AM).
- Latest
