Barangay kap gipatay

CEBU, Philippines - Patay ang kapitan sa Barangay Mantuyong, sa Dakbayan sa Mandaue, human gipusil sa wala mailhing mamumuno nga nagmotor samtang nag-estambay ang kapitan kuyog sa igsuon niini gawas sa ilang tindahan sa may V. Ceniza Street  sa maong barangay alas -5 sa buntag adlaw nga Miyerkules.

Ang nakalas naila nga si Antonino Maquillan, 57, taga Echevarie Street ug kapitan sa Barangay Mantuyong. Samtang ang mga suspetsado wala mailhi nagmotor, ug nagsuot og ski mask.

Matud pa ni Police Officer 2 Jayson Flores, Desk Officer sa Police Station 1 sa Mandaue naglingkod sa gawas sa gamay nilang tindahan ang kapitan kuyog sa iyang igsuon Virginia Maquillan.

Sumala pa ni Flores gigakos ni Virginia ang iyang igsuon aron dili pusilon hinungdan sa nahitabong komosyon apan napusilan gayud ang kapitan sa iyang tiil ug natagak sa iyang wheelchair maong niikyas ang mga mamumuno. Gidala kini sa tambalanan apan gideklarar sa doktor nga patay na tungod kay giatake kini sa sakit sa kasing-kasing ug dili sa samad pinusilan.

Nakuha sa crime scene ang usa ka kabhang sa bala sa kalibre .45 pistola  ug usa ka helmet. Padayon pang giila ang mga mamumuno ug motibo sa krimen lakip ang personal ug negosyo maoy gitutokan.

Si Mayor Gabriel Luis Quisumbing mitanyag og P200 mil nga reward sa makahatag og impormasyon o makatudlo kun kinsa ang nagpusil ni Maquillan.

Matud pa sa mayor ang asawa ni Maquilan mitug-an kaniya nga nakadawat ang kapitan og mga hulga ug pagpangilkil pinaagi sa text messages niadtong tuig 2016. Rowena D. Capistrano ug Romeo Limpangog (BANAT NEWS)