Laing kasaysayan ni Nietes

'Ahas' misakmit sa IBF flyweight title aron mahimong third-division world champion

CEBU, Philippines – Miagi og kalisud, apan mipatigbabaw ra gihapon si ALA Boxing Gym star Donnie ‘Ahas’ Nietes  (40-1, 22KOs) kinsa milampos pag-angkon sa IBF flyweight title pinaagi sa unanimous decision batok sa lig-ong si Komgrich Nantapech (22-4, 15KOs) sa Thailand niadtong miaging gabii sa main event sa ‘Pinoy Pride 40:Domination’ fightcard niadtong miaging gabii didto sa Waterfront-Cebu City Hotel and Casino.

Ang longest reigning Filipino world champion nga si Nietes milinya karon sa iyang kaugalingon uban sa mga legendary nga sila si Manny Pacquiao ug Nonito Donaire isip mga Pinoy world champions nga midaog og tulo o sobra ka mga world titles sa managlahing dibisyon.

Nindot ang sugod ni Nietes kinsa mipatugpa og mga kusog nga mga kinumo sa ulo ni Nantapech, apan ang Thai mipakita og kaisug ug gidawat ang mga kumo sa ALA warrior.

Pag-abot sa sixth round, miaksiyon og hinay ang 34-anyos nga Pinoy fighter rasun nga nakabuwelo si Nantapech kinsa mipaigo usab og mga kombinasyon ni Nietes. Gikan didto, nagsinukliay ang duha ka mga boksidor, apan si Nietes gihapon ang nakapasulod og mga limpyo nga sukmag.

Pag-abot sa katapusang duha ka rounds, miagresibo si Nietes kinsa mipakita sa iyang katakus sa counter-punching. Tungod niini, si Nietes ang midaog sa scores sa tulo ka mga hurado, 115-113, 117-111 ug 117-111.

"Wa gyud nako siya (Nantapech) gi-underestimate pero na-shock ko sa iyang kalig-on. Grabe sab siya mopresyur. Nakaigo ko og mga kusog nga sukmag pero sige gihapon siya'g abante," matud pa ni Nietes.

Sa maong kadaugan, si ALA Promotions President Michael Aldeguer nagkanayon nga pangusgan nila ang usa ka unification bout alang ni Nietes batok sa mga kampiyon sa ubang organisasyon.

Sa supporting bouts, ang undefeated featherweight nga si Mark ‘Magnifico’ Magsayo (16-0, 12KOs) diriyot wa paningta dihang gipatug dayun niya sa first round ang Tanzanian nga si Issa Nampepeche (24-2, 11KOs), samtang si Jeo ‘Santino’ Santisima (13-2, 11KOs)  milatos sa Indonesian nga si Master Suro (11-9, 2KOs) pinaagi sa unanimous decision. (BANAT NEWS)