Spurs, Raptors miabante na sa Semifinals

CEBU, Philippines - Hingpit na nga miabante sa semifinals ang San Antonio Spurs ug Toronto Raptors human  gipalukapa ang ilang mga karibal sa unang hugna sa NBA playoffs kagahapon sa managlahing binyu.

Didto sa FedEx Forum sa Memphis, Tennessee, si Kawhi Leonard mitali og 29 puntos sa dihang gitagak sa San Antonio Spurs ang Grizzlies sa iskor nga 103-96.

Si Tony Parker mipatuasik og 27 puntos sa Spurs nga mitapos sa series sa baraha nga 4-2.

“He is playing at an MVP level and I hope he can keep it going because we are going to need him in the next round,” matud pa ni Parker agi’g pagdayeg ni Leonard.

Sunod nga sangkaon sa Spurs ang Houston Rockets sa NBA Western Conference semifinals.

Daku sab og natampo si LaMarcus Aldridge nga dunay 17 puntos ug 12 ka rebounds sa Spurs nga nakadaog sa labing unang higayon didto sa Memphis karon nga season.

Nangu sa Grizzlies mao si Mike Conley uban sa iyang 26 puntos ug si Marc Gasol nga dunay 18 puntos. Si Zach Randolph mihipos og 13 puntos ug 11 ka rebounds sa pilderong koponan.

Sa laing bahin, si DeMar DeRozan mipabuhagay og 32 puntos alang sa Raptors nga diriyot mitiurok human naglabaw og 25 puntos sa second half dayon na ngadto sa pagpalagpot sa Milwaukee Bucks, 92-89.    Ila sab nga gitapos ang serye sud sa unom ka duwa.

Bukid hinuon maoy tungason sa Raptors gumikan kay ilang ikasangka sunod mao man ang defending champion Cleveland Cavaliers nga matawag sab nga dumot nga ‘rematch’ sa Eastern Conference finals sa miaging season.

Mikolapso ang Raptors human nakalabaw og 25 puntos hinungdan nga nakasikit ang Bucks ngadto na lang sa dos puntos, 80-78 sa nahabiling tres minutos sa duwa, apan sila si Jason Terry ug DeRozan nag-ambahan aron pagsalbar sa Toronto sa himalatyong segundos sa duwa. (BANAT NEWS)