Guardo mibayad aron suspensiyon libkason

CEBU, Philippines - Mibayad na kagahapon sa buntag si Konsehal Guardo sa iyang tulo ka buwan nga suspensiyon nga gipahamtang sa Department of Interior and Local Government (DILG)-7 nga nagkantidad og P69, 132.

Miabot sa maong kantidad ang nabayran ni Guardo sa tulo ka buwan sanglit ang gibasehan niini mao ang iyang sweldo dihang kapitan pa siya sa Barangay Sambag 1.

Kahinumduman nga ang Office of Ombudsman midesisyon sa Motion for Reconsideration or Clarification nga gisang-at sa konsehal human nga managlahi ang interpretasyon sa DILG ug Ombudsman-Visayas sa iyang kasong Simple Neglect of Duty.

Ang Ombudsman midesisyon nga tungod kay dili na man kapitan sa barangay si Guardo, ang suspensiyon niini mahimo na lang nga multa apan ang DILG miingon nga angayan gihapon ipatuman ang suspension order sanglit aktibo pa man sa serbisyo ang konsehal.

Gipaabot nga ipadala ni Guardo ang resibo sa iyang gibayran ngadto sa DILG-7 aron mopagawas og bag-ong order ang maong ahensiya nga maglibkas sa iyang suspensiyon. Aron makabalik na sa serbisyo si Guardo ug makahimo sa iyang mga trabaho isip konsehal sa Siyudad sa Sugbo.

Subay niini, si Mayor Tomas Osmeña mi-congratulate ug nagpasalamat kang Guardo sa maong kalambuan ug matud niini nga hatagan niya og daghang benepisyo ang barangay sa konsehal nga mao ang Sambag 1.

Dugang sa mayor nga gihatagan niya og dakong responsibilidad si Guardo ug kini mao ang pag-atiman sa plano sa usa sa mga nanag-iya og dakong luna sa maong barangay nga mao ang PHINMA nga maoy nanag-iya sa iladong unibersidad sa dapit.

Buot nila nga ang maong unibersidad mahimong bukas sa publiko hinungdan nga maghimo sila og access road ug road widening mao nga gikinahanglan nila ang tabang sa kagamhanan sa siyudad. (BANAT NEWS)