3,000 nisalmot sa LWYD, Jamboree

CEBU, Philippines - Dul-an sa tres mil ka batan-on gikan sa nagkadaiyang parokya sa Archdiocese of Cebu ug silingan nga Diocese ang niapil sa pagbukas sa 31st Local World Youth Day ug Vocation Jamboree  kagahapon sa buntag sa Seminario Mayor de San Carlos sa Dakbayan sa Sugbo.

Ang maong kalihukan gisugdan sa usa ka Santos nga Misa ug gisunod ang opisyal nga pagbukas sa maong kalihukan nga matapos karong Domingo atol sa misa sa lukay nga dumalahon ni Archbishop Jose    Palma.

Ang upat ka adlaw nga LWYD-VocJam gidumala sa Family of United and Empowered Leader District 8 kauban ang Commission on Youth ug Directors of Vocation Cebu Chapter.

Ang LWYD ug VocJamb managlahi nga selebrasyon sa Archdiocese of Cebu matag tuig apan karon giusa kini ubos sa tema nga “Go forth...build communities.”

Si Palma sa iyang endorsement letter niawhag sa kabatan-onan sa pag-apil sa maanindot nga kalihukan diin adunay posibilidad nga madiskobrehan ang Christian calling.

Karong adlawa ang mga delegado maghugpong sa mga congregations diin sila na-assign aron magkat-on sa kinabuhi sa mga religious congregations ug mandated organizations. (BANAT NEWS)