Anak sa drug surrenderer nahataga’g scholarship

CEBU, Philippines - Ang iyang amahan nga usa ka drug user kaniadto nga mitahan na sa kapolisan maoy nagsilbing taytayan sa 19 anyos nga tinun-an aron makapadayon sa iyang pag-eskuyla.

Si Policher Casquejo,  nga taga Cordova,  usa na karon sa scholar sa Probinsya sa Sugbo ubos sa Paglaum Scholarship Program human nga siya na-estambay og duha ka tuig sukad sa iyang paggradwar sa high school kay wala silay kwarta tungod sa kalisod.

Matud ni Casquejo nga niadtong panahona tiggamitan og ilegal nga drugas ang iyang amahan nga usa ka trisikad driver samtang janitor sa usa ka subdivision ang iyang inahan.

 Matud ni Casquejo dili igo ang sweldo sa iyang  ginikanan aron nga paskwelahon silang tanang unom ka magsuon diin siya maoy kinamaguwangan.

Human masayod kabahin sa scholarship program sa Kapitolyo alang sa mga durugista nga mitahan gikuha niya kini nga oportunidad.

Matuman na gyud ang iyang damgo nga makatungha sa kolehiyo og Bachelor of Science in Education major in English ang iyang kursong gipili.

Si Casquejo mikuyog atol sa gipahigayon nga Oplan Tokhang kagahapon ni Gobernador Hilario Davide III ug Bise Gobernador Agnes Magpale nga gihimong ehemplo sa Kapitolyo nga dili pa uwahi ang tanan niadtong mga biktima sa ilegal nga drugas.

Si Davide ug Magpale misuroy sa Poblacion inubanan sa director sa Cebu Provincial Police Office Sr. Supt. Eric Noble aron mokampanya batok ilegal nga drugas ug cyberpornography.

Si Noble miingon nga mao pa kini ang labing unang higayon sa nasud nga ang gobernador ug bise gobernador mao nay personal nga nikuyog sa Oplan Tokhang.

Duha ra ka balay ang nabisita sa mga opisyal ug nanghatag usab sila og duwaan ug mga chocolates sa mga bata ug nakigtagbo sila sa mga barangay health workers,  tanod ug uban pang opisyal sa barangay apil na sa mga drug surrenderers diha sa Cordova Central Elementary School aron sila hangyoon nga magtinabangay sa pagbatok sa ilegal nga drugas.

Ang Cordova adunay 898 ka mga drug surrenderers,  180 ang pusher ug 718 nga users.

Atol usab sa tigom, gitugotan ni Davide nga mabalhin ang pipila ka priso sa Cordova ngadto sa CPDRC basta anaay court order tungod kay ang 30 ka tawong kapasidad nga karsel niabot na og 95 ka priso ug gisagol ang babaye ug lalaki. Le Phyllis F. Antojado ug Romeo Limpangog (BANAT NEWS)