Pinoy boxers nanalasa agad

MANILA, Philippines - Magarbong sinimulan ng national boxing team ang kampanya nito matapos magtala ng pambuenamanong panalo ang anim na pambato ng Association of Boxing Alliances in the Philippines (ABAP) sa King's Cup Bo­xing Tournament sa Queen Sirikit Sports Complex sa Thanyaburi District, Pathum Thani Province sa Thailand.

Nanguna sa ratsada ng Pinoy pugs si Joel Bacho nang sorpresahin si World Series of Boxing (WSB) at AIBA Pro Boxing (APB) veteran Arisnoidys Despaigne ng Cuba sa bendisyon ng 3-1 panalo sa men’s welterweight (69 kilos).

Hindi alintana ni Bacho ang magandang rekord ni Despaigne na silver medalist sa World Championships kung saan ginamit nito ang kanyang utak upang maitala ang panalo.

“Maganda ang strategy ni Joel. Mautak siyang lu­maban. Cuban coach Enrique Steiner came over to congratulate us and concede that they were unprepared for a much-improved Bacho. I think Joel's time has come,” ani Philippine head coach Pat Gaspi.

Maganda rin ang simula ni 2015 Southeast Asian Games gold medalist Eumir Felix Marcial nang itala nito ang agresibong technical knockout (TKO) victory laban kay Japanese Ren Umemura sa middleweight (75 kilos).

Nagpasya ang referee na itigil ang laro sa huling kanto matapos paliguan ni Marcial ng suntok ang Japanese fighter na nagresulta sa pagdurugo ng ilong ng huli.

Hataw din ng knockout win ang 21-anyos na si James Palicte laban kay Patrick McLaughlin ng Australia. Malalakas na suntok ang pinakawalan ni Palicte na direktang tumama sa mukha ng Australian bet dahilan upang dumugo ang ilong at bibig nito sa second round.

Pare-pareho namang may 5-0 unanimous decision win sina Carlo Paalam laban kay Australian Alex Winwood, Ian Clark Bautista laban kay Juhyeon Chloe ng South Korea at Mario Fernandez laban kay Hussam Uddin Mohammed ng India.