EDITORYAL - Doble kara

Daghan ang nakadayeg ni Presidente Rodrigo Duterte sa iyang gihimo nga pagtaktak dayon sa katungdanan ni DILG Secretary Ismael Sueno nga gipasanginlan lang gani nga nalambigit og kuwestyonable nga kalihukan.

Bisan og wala pa gani mamatud-i kun si Sueno nakakuwarta ba sa pagpamalit og firetrucks gikan sa Austria, gipatiran na siya ni Duterte ug gipalagpot gikan sa iyang katungdanan.

Samtang abtik kaayong nakadayeg ang uban ni Duterte, apan daghan sab ang nakapangyamiid tungod kay wala man taktaka sa presidente si Cesar Montano isip chief operations officer sa Tourism Promotions Board.

Silang duha si Sueno ug Montano pareho nga nag-atubang og pasangil sa kurapsyon ug pag-abuso sa gahum. Kun tan-awon pag-ayo, dako gani og utang kabubut-on si Duterte kang Sueno kay pangulo kini sa grupo nga misuporta kaniya sa iyang pagpapili.

Kun adunay tulo ka Undersecretaries sa DILG nga mireklamo batok kang Sueno, ang mga kawani sa Tourism Promotions Board miladlad og 24 ka matud pa kalapasan nga nahimo ni Montano sa ilang reklamo nga gipadala sa Presidential Action Center.

Apan wala tagda ni Duterte ang maong reklamo batok ni Montano kay matud sa presidente nga dako siya og pagsalig sa kanhi artista nga iyang tinudlo sa katungdanan sa kagamhanan.

Makapalibog ang gihimo ni Duterte. Tungod ba kay mas bug-at kaniya si Montano mao nga wala niya tagda ang reklamo batok sa iyang tinudlo nga opisyal sa PTB? Dili ba angay unta nga paimbestigahan niya si Montano aron sutaon kun tinuod ba ang mga reklamo batok kaniya?

Kun ibutang nato nga may bug-at nga kasayuran si Duterte nga nakahimo gyud og dakong sala si Sueno, dili igo nga taktakon ra kini sa katungdanan. Kinahanglan nga pasakaan gyud kini og kaso sa hukmanan.