Yaw-Yan Summer clinic mosikad ugmang adlawa
CEBU, Philippines - Ang tinuig nga summer clinic sa Yaw-Yan ArDigma Martial Arts Federation sugdan na ugmang adlawa diha sa ilang headquarter nga nahimutang sa ikaupat nga andana sa Coast Pacific Downtown Center sa dalan Sanciangko, siyudad sa Sugbo.
Lahi sa mga miaging edisyon, ang mga tinun-an makasuway usab pag-ensayo sulod sa ‘steel cage’ nga maoy gigamit sa duwa nga mixed martial arts. Misikat ang ‘steel cage’ sa mga dagkung MMA tournaments sama sa UFC ug ONE Championship.
“Training inside the cage gives more excitement especially for those mixed martial arts fans,” matud pa ni Yaw-Yan ArtDigma Cebu CEO/Founder ug Vis-Min director Master Benigno ‘Ekin’ R. Caniga Jr.
Ang Yaw-Yan ArDigma usa ka all out martial arts nga mogamit sa lawas isip hinagiban ug motudlo sa mga tinun-an og saktong pamaagi sa sukmag, patid, siko, tuhod ug ground fighting isip self defense.
Dugang pa ni Caniga nga padayon gihapon sila nga nanawat og mga estudyante nga mokat-on sa maong martial arts. Alang sa dugang mga kasayoran, mahimong mobisita sa Yaw-Yan Gym o motawag sa numero 0943-6568900. (BANAT NEWS)
- Latest
