72 nadakpan sa Oplan double barrel

CEBU, Philippines - Niabot og 72 ka tawo ang nadakpan sa kapolisan sa lainlaing dapit sa dakbayan sa Sugbo kaniadtong Martes sa gabii kay matud pa nakahimo sila og kalapasan sa balaod.

Matud ni Senior Inspector Narrolf Tan, ang deputy chief sa Criminal Investigation Branch (CIB) sa Cebu City Police Office, ang maong mga tawo nadakpan atol sa gitawag nila og “Oplan Project Double Barrel Reloaded.”

Ang nisalmot sa operation mao ang mga sakop sa CIB, City Intelligence and Detective Management Branch, Police Station 1 ngadto sa 11 nga gipangulohan ni Supt. Ryan Devaras.

Sagad sa mga nadakpan naglambigit og kaso sa ilegal nga drugas, samtang ang uban kabahin sa paglapas sa balaod nga nagdili sa illegal nga sugal nga masiao, illegal possession of firearms, pagpanulis, pagpangawat ug uban pa.

Si Tan miingon nga sa maong operation nakasakmit sila og 45 gramos nga shabu nga mobalor og dul-an sa P600 mil, duha ka armas ug mga bala, walo ka illegal gambling machines, ug dul-an sa P3 mil nga kuwarta nga gituohang halin sa ilegal nga drugas.

Samtang duha ka giingong drug pusher ang nasikop atol sa buy-bust operation didto sa Barangay Tangke, Talisay kaniadtong Martes sa hapon. Sila mao si Catalina Nuñez, 43, ug Richard Resane, 22.

Sumala pa ni Talisay Police chief Emerson Dante nga nakadawat sila og kasayuran nga si Nuñez aktibo kaayo sa pagpamaligya og ilegal nga drugas mao nga gihimoan dayon nila og buy-bust operation.

Nasakmit sa kapolisan gikan ni Nuñez ang duha ka medium-sized packs nga shabu ug laing 45 ka gagmay’ng pakete nga shabu nga ang tanan gibana-bana nga mokantidad og dul-an sa P50 mil. Si Resane nakuhaan usab og 11 ka gagmay’ng pakete sa shabu.

Sa buwag nga buy-bust operation didto sa Barangay Pagsabungan ug Barangay Centro, Dakbayan sa Mandaue, duha ka suspetsadong pusher ang nadakpan.

Si Joly Cuajao, 23, maoy nadakpan didto sa Barangay Pagsabungan nga nasakmitan og shabu nga kantidad og P5,500. Sa Barangay Centro nadakpan usab si Milo Orio ug nasakmitan kini og mga P5 mil nga shabu. Gabriel C. Bonjoc, Rowena D. Capistrano ug Romeo Limpangog (BANAT NEWS)