2 ka dalagita gipanglugos

CEBU, Philippines - Duha ka dalagita ang gilugos didto sa Carcar City ug sa lungsod sa Carmen ug gituohan nga ang naghimo niining mao nga pagpangabuso sa kababayen-an naulipon sa gidiling drugas.

Ang 12-anyos nga taga Barangay Tuyom, Dakbayan sa Carcar giingong gipugos pagdala sa duha ka lalaki ngadto sa kasagingan ug didto ilang gibanus-banosan paglugos kaniadtong Domingo sa hapon.

Nadakpan na hinoon sa kapolisan ang mga suspetsado nga sila si Jonathan Requinto, 23, ug Ryan Subelario, 18.

Matud ni PO1 Rheystell Yanas sa Carcar Police Station, nga nidangop kanila ang biktima kuyog sa iyang inahan.

Ikaduha na diay ka higayon ang paglugos sa maong dalagita kaniadtong Domingo kay una kining gilugos kaniadtong Marso 13 diha nga kalit lang gibitad ni Requinto samtang siya naglakaw kay gisugo sa iyang ginikanan.

Kaniadtong Domingo giusban na usab siya paglugos ug may kauban na si Requinto nga miamong-among kaniya. Saysay sa biktima nga gipaum-om pa kaniya ang kinatawo sa usa sa mga rapist.

Kaniadtong Lunes, gilugos usab didto sa Barangay Ypil, Carmen ang usa ka 14-anyos nga tinun-an sa Grade 9. Ang minyo nga lalaki nga milugos sa biktima wala pa madakpi.

Si SPO1 Josephyl Pantoga sa Carmen Police Station miingon nga  padulong na mopauli ang biktima sa ilang balay dihang kalit lang gibitad sa lalaki ngadto sa kasagbutan ug didto gipahimuslan.

Wala pa ibutyag ang ngalan sa suspek nga gipangita pa sa mga polis, apan kun dili kini madakpan, pasakaan na lang kini og kaso. Si Cebu Provincial Police director Eric Noble miingon nga apektado sa drugas ang pipila ka barangay sa dakbayan sa Carcar ug Carmen.

Matud ni Noble nga gawas sa dakbayan sa Carcar, ang ubang siyudad sama sa Naga, Talisay, Toledo ug Bogo apektado sab sa drugas. Gikataho nga 15 ka barangay sa dakbayan sa Carcar ang "moderately affected" sa drugas ug usa ang "slightly" affected.

Mahinumdoman nga dunay upat ka bulan nga bata nga nabiktima usab sa pagpanglugos sa Carcar pipila ka bulan na ang nakalabay ug nasayran sa kapolisan nga nakagamit sab og drugas ang nasikop nga suspetsado.

Hinoon sa kaso sa 12-anyos nga labing ulahing nabiktima sa pagpanglugos sa Carcar wala pa’y inpormasyon ang kapolisan kun ubos ba sa impluwensya sa drugas ang duha ka suspetsado nga      nasikop.

Gimando ni Noble nga ipa-ubos sa drug test ang mga suspetsadong milugos sa dalagita aron masayran kun wala ba gayud sila nigamit og ilegal nga drugas. Jojo C. Ugdol/Rowena Capistrano (BANAT NEWS)