Making Dreams Happen

CEBU, Philippines - Aduna gyu’y solusyon ang tanang mga gisagubang nga problema sa kinabuhi gumikan kay wala'y gihatag ang Ginoo kun dili kini nimo makaya. Hugot nga gituohan sa 23- anyos nga si Dave Alcano nga usa usab ka miyembro sa hugpong LGBT, nga ang tanangmga diskriminasyon nga iyang nadawat sukad pa sa una, mga ginagmay nga tunok lang kini sa iyang pagsubay sa dalan sa kalampusan.

Sa pagpakighinabi ni Dave saBanat NewsHugyaw, nagkanayon kini nga sukad pa niadtong bata pa siya, kanunay siya sungugon sa mga tawo. Kanunay niya nga madunggan nga ang mga bayot wala ray kapuslanansa katilingban.

Mao nga niadtong tungora, nisulod na sa iyang alimpatakan ang mga sama niya og sekswalidad adunay daghang ikabuga sama sa uban. Dugang pa niya nga hatagan niya og hustiya ang tanang sakop sa LGBT nga patas lang gyud ang katungod ug baruganan bisan na og managlahi kini og sekswalidad ug mga pagtuo.

“Dili ko ganahan nga isalikway nila ang mga bayot tungod kay kun buot huna-hunaon, mas daghan og nahimo ang mga bayot. When it comes to entertainment and other stuffs labi na ogmagpamake-up ug mangita og gown, daghan ang nanginahanglan gyud namo”, suma pa ni Dave.

Gibutyag niya nga sa 10 nila ka managsuon, tulo nila ang managsama kaniya og sekswalidad.

“At first, dili madawat sa akong mga ginikanan pero nakita man nila nga maayo mi modiskarte unya motabang sad mi sa amo mao nga niuyon ra pud sila eventually”, saysay pa niya.

Agi og  pagtabang ni Dave sa iyang pamilya , mangita siya  og mga raket sama sa pag-perform isip clown sa mga party, hair and make-up, hosting,  pagkanta ug ang pagsalmot og mga beauty pageant. Dugang pa niya nga kun wala siya’y salmutan nga kompetisyon, mokuyog siya sa iyang igsuon nga si Jaya Alcano aron motabang  sa mga raket niini.

Nahigustan ni Dave nga kinahanglan niya nga mangita og ginagmay nga panginabuhian aron adunay matabang ngadto saiyang pamilya. Gani, nihunong siya sa iyang pagtungha gumikan kay dili na siya masuportahan sa iyang mga ginikanan.

Aron dili laayon sa balay, nakahukom siya nga mosalmot og singing contest sa edad nga 14- anyos. Sa pagtungtong niya og 17- anyos, niusab na ang timbre sa iyang tingog. Nadismaya siya og maayo  gumikan kay kalit lang kini nahitabo nga mausab ang iyang tingog. Matud pa niya nga tingog sa usa ka babaye ang naandan nga madunggan sa kadaghanan kun siya mokanta apan niabot na gyud ang iyang gikahadlukan nga tingog sa usa ka lalaki  maoy mugawas.

“Taas gyud ko og tingog sa una. Nakahilak ko ato kay kato gyud sa grand finals siya nausab. Go The Distance ang akong piyesa pero wala na nako siya maabot. Kalit ra gyud kaayo to. Grabe kaguol gyud nako ato oy”, paghinumdom  pa niya.

Usa ka tuig usab siya nga mipahuway sa pag apil-apil og mga kompetisyon tungod sa kaguol. Apan kalit ra usab nga nakakita siya og paagi aron makabalik sa pagkanta. Misuway siya og mga kanta nga haum sa iyang bag-ong tingog ug nauyunan ra usab niya kini. Gani, nipatok kini gumikan kay palahi ang klase sa iyang tingog itandi sa uban.

Daghan usab ang mahugyaw sa matag tungtong niya sa entablado gumikan kay inig patim-aw niya sa mga tawo, usa siya ka babaye apan og magsugod na siya og kanta, ang madunggan sa mga tawo mao ang usa ka“rocker boy”.

Sa pagkalakip ni Dave sa Sinulog Idol Season 8, gihulagway niya nga damgo lang usab ang tanan nga nahitabo gumikan kay wala niya damha nga usa na siya nga nitungtong sa stage sa Fuente OsmeñaCircle. Matud pa niya nga pangandoy gyud niya nga makakanta atubangan sa mga tawo nga mobisita sa maong dapit.

Gitug-an niya nga ikaduhang higayon na siya nga mi-audition sa Sinulog Idolapan napakyas siya sa unang higayon gumikan kay adunay kakulian nga nahitabo. Tuod man, nipadayon gihapon siya sa iyang damgo nga mobalik og audition ug namasin  kun  madala ba gyud siya sa maong kompetisyon.

Dili matupngan ang kalipay nga iyang gibatisa dihang nahibaw-an niya nga nasulod na gyud siya sa  Sinulog Idol. Padayon usab niya nga gihimug-atan ang iyang tumong nga mahimong ehemplo sa tanang miyembro sa LGBT nga wala’y gidili nga kompetisyon alang kanila gumikan kay tanan pwede nga apilan kun kahibaw lang gyud kini mopakita  sa ilang   talento.

Mapasalamaton usab siya gumikan kay daghan ang nihangop kaniya.

“Nalipay kaayo ko kay gitabangan ko nila (Sinulog Idol coaches) nga mapakita gyud kung kinsa si Dave Alcano not just an LGBT representative but as a performer and as a singer”, suma pa niya.