Tomas Osmeña polis?

Nangunay si Mayor Tomas Osmeña pagpangita ni David Lim Jr. nga namusil ni Ehpraim Nuñal, usa ka nurse nga gikalalis niini tungod sa bangi sa trapiko.

Bisan dili kaila ni Osmeña ang biktima, iyang gipakita nga concern siya. Dili gusto sa mayor nga adunay maghari-hari sa dakbayan sa Sugbo. Sa mga report, dihang giadto ni Osmeña ang balay ni Lim, gitakin niya si SPO1 Adonis Dumpit ug mao seguro  ang hinungdan nga mitago ang batan-ong Lim tungod kay dili siya gusto nga mosunod ni Ronron Go nga gipatay ni Dumpit.

Dihang si kanhi Mayor Mike Rama nag-traffic enforcer, human makita ang kahuot sa trapiko, nagsul-ob og sapot sa bombero dihang miresponde og sunog, gisaway kini ni Osmeña kaniadto, apan karon si Osmeña na usab ang nagpapolis-polis.

Dili na lang unta manaway kay mangopya ra man diay siya sa gihimo ni Rama.

Sa away sa trapiko naklaro ug milutaw na usab ang pagka oportunista ni Osmeña. Nakita sa mayor nga nag-viral sa social media ang pagpamusil ni Lim Jr. sa usa ka nurse ug miani kini og mga pagsaway, mao nga dali ra kaayo siya nga nakasakay niini, front seat pa.

Matingala pa ba mo sa gihimo sa mayor? Nagpahumot si Osmeña sa mga Sugboanon ug sa mga opisyal sa nasud. Nagpadala’g text message ang mayor ni Bong Go, ang special assistant to the president, nga kunohay ipaabot ngadto ni Presidente Rodrigo Duterte nga siya kontra abuso.

Pero hilaw og tinagdan kaniya si Bong Go. Kaluoy ni Tomas bisan unsa na lang ang gihimo nga mapaduol lang siya sa dughan ni Digong. Ang inahan ni Lim nga si Judelyn nangayo usab og tabang ni Bong Go, ug siya gitagad.

Nganong didto man mangayo og tabang ni Bong Go? Nganong dili man kang Osmeña? Posible nga mas dako og pagsalig si Judelyn kang Bong Go kay ni Osmeña. Tingali pud gipakita sa mga Lim nga may koneksyon sila sa Malakanyang.