Mental facility tukuron sa probinsiya

CEBU, Philippines - Si Gobernador Hilario Davide III nagtinguha sa pagtukod og mental health facility aron mokunhod ang gidaghanon sa mga pasyente nga dunay problema sa panghuna-huna sa Vicente Sotto Memorial Medical Center (VSMMC).

Atol sa Provincial Health Board meeting niadtong Lunes, ang gobernador nagkanayon nga dako og tabang ang pagtukod og mental health facility diha sa mga provincial hospitals tungod kay dili na unya maghuot ang pasyente sa VSMMC.

Gitinguha usab ni Davide nga matabangan ang mga kabus nga naghambin og problema sa panghuna-huna ug behavioral problems.

Si Bokal Christopher Baricuatro, chairman sa committee on health sa Hunta Probinsiyal, nisugyot nga ang Pinamungajan District Hospital angayan nga butangan og mental health facility tungod kay duna kini lapad nga lugar.

Sa giingong pagsaka sa gidaghanon sa kaso sa anxiety, depression ug psychological disorder, si Bokal Miguel Antonio Magpale niduso og resolusyon nga nag-awhag sa Cebu Provincial Health Office ug mga lokal nga kagamhanan sa probinsiya nga mogama og pasilidad alang sa mga minor ug major health issues.

Sa report sa Hopeline Cebu niadtong Agosto hangtud sa Disyembre 2016, niabot na ngadto sa 12 porsiyento ang inquiries sa depression diin ang problema sa pamilya siyam ka porsiyento, suicidal crisis tulo ka porsiyento, upat ka porsiyento ang anxiety attack ug ang relationship problem dunay 17 porsiyento.

Ang Hopeline Cebu o Tawag Paglaum usa kini ka 24/7 confidential crisis support service nga naumol niadtong Agosto 2015 sa Sugbo aron matabangan ang mga tawo nga nakasinati og emotional crisis.

Ang mga responder sa Hopeline gilangkuban sa mga nurse ug psychologists kinsa ang ilang tahas mao ang pagdawat og tawag gikan sa mga tawo nga mangayo og tambag ug kadtong nagkinahanglan og kaestorya.

Giingong uban sa mga nanawag nipadayag sa responder nga buot na silang magpakamatay ug dunay uban nga nisuway na sa pagpakamatay apan napakyas sa mao nilang tinguha. (BANAT NEWS)