4 Maute terrorists timbog
MANILA, Philippines - Umiskor ang mga elemento ng Joint Task Force ZamPeLan (Zamboanga Peninsula and Lanao) matapos na masakote ang apat na wanted na miyembro ng Maute terrorist group na sangkot sa pambobomba at iba pang kriminal na aktibidades sa raid sa Lanao del Sur kamakalawa.
Sa ulat ni Major Gen. Carlito Galvez Jr. , Commander ng AFP Western Mindanao Command (Westmincom) ang mga nasakoteng suspek ay sina Pao Panganga alyas Faizal, Alex Areg Bagul, Alisata Tumao Maute at Saadra Macapanton Madayan.
Ang mga suspek ay sangkot sa kidnapping for ransom, gun-for-hire, carnapping, pambobomba, extortion at maging sa illegal drug trade sa lalawigan ng Lanao del Sur at Lanao del Norte.
Sinabi ni Galvez na bandang alas-3 ng madaling araw ng magsimulang magsagawa ng magkakahiwalay na law enforcements operations ang tropa ng mga sundalo sa mga bayan ng Piagapo at Saguiran; pawang sa lalawigang ito na nagresulta sa pagkakahuli sa apat na terorista.
Nabatid pa na ang mga suspek din ang sangkot sa pagpatay kay Supt. Abner Wahab Santos, dating konsehal at Director ng Marawi City.
Samantalang si Panganga ay sangkot naman sa serye ng kidnapping sa Marawi City kabilang ang pagdukot ss biktimang si Omira Lotao, empleyado ng Mindanao State University noong Marso 5 ng taong ito.
Nasamsam sa operasyon ang tatlong matataas na kalibre ng armas, isang pistol, isang Improvised Explosive Device (IED’s) at mga drug paraphernalia.
- Latest