Davide di uyon nga i-appoint ang Kapitan

CEBU, Philippines - Nagsumpaki ang baruganan sa tag-as nga mga opisyal sa Kapitolyo bahin niining uwahi nga pamahayag sa presidente sa pagsuspenso na sab sa piniliay sa Barangay ug Sangguniang Kabataan karong Oktubre. Si Gobernador Hilario Davide, III dili uyon nga ang mga mayor hatagan og pagtugot sa pagtudlo og mga kapitan sa ilang mga barangay. Kini subay sa gikatahong pagsibog sa SK ug Barangay Election ug ang mga mayor hatagan og appointing authority sa pagtudlo og mga kapitan sa ilang barangay.

Si Davide mipadayag sa iyang pagsupak niini kay posibleng masagulan gyud kini og bulok politika. Matud niini nga labing maayo nga ang mga konstituwente maoy mopili sa ilang lider sa barangay ug mas maayo nga  idayon na karong tuiga ang piniliay sa SK ug Barangay.

Dugang ni Davide nga ang mga konstituwente kinahanglang masayod sa background sa mga mokandidato.

Kun dili uyon ang gobernador sa pag-postpone sa eleksiyon, si Bise Gobernador Agnes Magpale uyon nga iuswag ang piniliay.

Nakita ni Magpale ang kabalaka sa presidente nga posibleng magamit na usab ang drug money sa piniliay ilabina nga wala pa gihapon maundang ang ilegal nga drugas sa nasud. Niining ulahi lang, si Presidente Rodrigo Duterte nanawagan sa pagpauswag na usab sa SK ug Barangay Election human nabalaka siya sa narco-politics. Brenda D. Batuto ug Le Phyllis F. Antojado (BANAT NEWS)