3 Romanians gidakop

CEBU, Philippines - Tulo ka mga Romanian nationals ang gidakop sa mga sakop sa National Bureau of Investigation-7 may kalambigitan sa gihimong imbestigasyon kalabot sa ATM skimming nga niigo sa usa ka bangko sa Land Bank of the Philippines sa Banilad ning Dakbayan sa Sugbo.

Ang usa sa gidakop mao si Lonup Alesandrou samtang wala pa pangalani ang iyang duha ka mga kauban atol ning pagsulat sa balita.

Sila gidakop sa grupo ni Florante Gaoiran, agent on case sa NBI human na-serve ang search warrant nga giisyu ni Regional Trial Court Judge Generosa Labra sa Branch 23 diha sa usa ka condominium sa Barangay Lahug, Cebu City.

Kahinumdoman nga ang LBP midangop na sa NBI Office niadtong Miyerkules aron magpatabang sa imbestigasyon gumikan sa daghan na sa ilang mga depositor ang nabiktima.

Ang NBI nakakuha og mga kopya sa footages sa closed-circuit television footages, bank records sa mga biktima sa ATM skimming ug uban pang mga dokumento nga makatabang sa imbestigasyon.

Kagahapon, ang mga suspek giimbitar diha sa ilang buhatan alang sa mga pagpangutana human nga sila nakita sa CCTV sa bangko.

Wa pa ibutyag kun unsang mga ebidensiya ang nakuha nga nakaingon sa pagsikop kanila.

Sa sayo pa kagahapon, ang LBP nipagawas og pamahayag nga nakig-alayon sila sa NBI ug sa ubang mga otoridad aron masulbad kining maong kaso nga nakaapektar sa ilang mga depositor.

Adunay nadiskubrehang mga skimming device sa LBP ATM sa Banilad, Mandaue City ug dali kining gitangtang sa mga taga bangko.

Base sa ilang pagsusi, adunay 50 ka mga depositors sa maong bangko ang gituohang nabiktima ug tungod niini, gipa-recall ang gibanabanang  dos mil ka mga accounts nga nagkupot og ATM cards aron pag-ilis sa ilang mga Personal Identification Numbers o PINs  o mo- request og bag-ong  cards sa mga Visa debit cardholders.

Giawhag usab sa LBP ang cardholders nga mo-avail sa ilang Mobilock usa ka libreng mobile banking app sa mga android phones nga ma-download sa Apple App Store ug Google Play Store aron gikan didto ilang ma-monitor kun dunay mga ilegal nga transaksyong nahitabo ug mapakgang dayon kini.

Niadtong tuig 2015, usa gihapon ka Romanian national ang gidakop sa mga sakop sa Cebu City Police Office nga si Gheorghe Adelin Stretcu, 32,kinsa giingong sakop sa usa ka bank hacking syndicate sa Uropa. Le Phyllis Antojado ug Mylen Manto (BANAT NEWS)