Natokhang kaniadto gipatay

CEBU, Philippines - Patay ang usa ka lalaki nga kanhi mitahan sa Oplan Tokhang human kini pusila sa ulo samtang sakay sa iyang motorsiklo diha sa Sitio Riles, Poblacion Ward 2, Minglanilla niadtong nakalabay nga gabii.

Ang biktima giila nga si Armeños De Gracia Villasencio, 28, nga nagpuyo sa maong dapit.

Matud pa ni Police Officer 2 Alden Traya, desk officer sa Minglanilla Police nga nahinabi sa Banat News mitahan na sa Oplan Tokhang ang biktima kaniadto apan ilang nasayran nga aktibo gihapon kini sa kalihokan sa drugas sa ilang dapit.

Ang biktima gikan mipalit og barbecue ug pabalik na pauli sakay sa iyang motorsiklo dihang giingong gituparan kini og laing motorsiklo nga gisakyan og duha ka mga lalaki nga nagkalo.

Ang backrider maoy mipusil sa biktima sa makadaghang higayon dayon mipasirit palayo.

Sulay pa unta kini nga gidala sa Minglanilla District Hospital apan nakabsan kini sa kinabuhi.

Sa crime scene nakuha sa mga polis ang tulo ka basiyo sa bala sa kalibre .45 nga pistola.

Personal nga atraso ug anggulo sa ilegal nga drugas ang ilang gitan-aw sa maong pagpatay.

Samtang patay usab ang usa ka pintor diha sa Sitio Batoon, Brgy. Pajac, Dakbayan sa Lapu-Lapu sa miaging Sabado sa gabii.

Si Police Officer 3 Joseph Ruel Cutanda, imbestigador sa Homicide Section sa Lapu-Lapu City Police Office (LLCPO) miila sa biktima nga mao si Ruel Amores Ontong, 39, taga Sitio Sambag sa maong barangay.

Base sa imbestigasyon ni Cutanda nga naglingkod ang biktima sa gawas sa ilang panimalay dihang gipusil kini og wala mailhing tawo nga giingong nagpahipi sa ngitngit nga bahin sa maong dapit.

Giingong nakadagan pa unta ang biktima pasulod sa ilang balay apan wana kini makaabot didto kay nahagba sa yuta ug namatay.  Wala na diha ang mamumuno pag-abot sa mga tawo.

Si PO3 Erwin  Senadjan sa Presinto 2 sa LLCPO nga nahinabi sa Banat News miingon nga nag-unang anggulo nga ilang gisubay ang gikataho nga panaglalis sa duwa sa basketball sa biktima ug wala pa mailhing  lalaki sayo nianang adlawa. - /EIM) (BANAT NEWS)