HRW hinamon ng PNP sa EJKs

MANILA, Philippines -  Hinamon kahapon ng Philippine National Police (PNP) ang Human Rights Watch (HRW) na maglabas ng ebidensya sa kontrobersyal na pahayag hinggil sa “license to kill” na ibinigay umano na go signal ni Pangulong Duterte sa kapulisan kaugnay ng extra judicial killings (EJK’s) sa bansa.

Kasabay nito, pinaalalahanan ni PNP spokesman Sr. Supt. Dionardo Carlos, ang HRW na huwag akusahan o lahatin ang 165,000 puwersa ng PNP na sangkot sa EJK’s laban sa mga drug personalities.

Sa ulat ng HRW na may titulong “License to Kill’ na ipinalabas kahapon, sinabi ng HRW na may 24 kaso ng EJK simula noong Oktubre 2016 na kinasangkutan mismo ng mga pulis.

Ibinunton rin ng HRW kay Pangulong Duterte ang mga nagaganap na EJK dahilan ito mismo ang nagbubuyo sa mga pulis na pumaslang ng mga drug personalities.

“Provide the evidence, affidavits and the accounts because it’s easy (to make such statements). For us, we will not hide anything, if there is something wrong, we will correct it, if there are violations of law, we will file cases,” ani Carlos.

“Allegations like these need proof and formal complaint to act on…they should be more specific and they should not say it’s the entire PNP,” dagdag nito.

Sinabi ni Carlos na welcome sa PNP ang pagsasampa ng reklamo kaugnay ng mga kasong inimbestigahan ng nasabing ahensya.

Inihayag ni Carlos na simula noong Hulyo 2016 ay nasa 28 kaso ang iniimbestigahan ng PNP-Internal Affairs Service (IAS) laban sa mga pulis.