EDITORYAL - Papel sa PNP vs drugas

Maayo kining plano nga ibalik sa kampanya kontra ilegal nga drugas ang kapolisan human sa kapin usa ka bulan nga sila gipahunong niini tungod sa pagkalambigit sa pipila ka polis sa binuang gamit ang Oplan Tukhang.

Tinuod gyud nga human nga gipahunong ang kapolisan, nikunhod gyud ang mga operasyon batok sa ilegal drugs kay ang Philippine Drug Enforcement Agency na man lang maoy gisangonan sa kampanya nga 1,800 ra ang mga sakop niini sa tibuok Pilipinas.

Ang PDEA giabagan hinoon sa Armed Forces of the Philippines sa kampanya human gitangtang ang kapolisan, apan dili pareho og katakus ang mga sundalo sa mga polis sa natad sa mga ingon niini nga operasyon.

Busa dili na ikatingala kun ngano nga nimenos ang operasyon sa PDEA, bisan pa sa tabang sa AFP tungod kay dili man trabaho sa mga sundalo ang mangimbestigar. Gani human nga gipahunong ang PNP paghimo sa anti-illegal drugs operation, namalik  ang mga drug personalities sa ilang modus operandi nga wala maapil sa natukhang.

Mao kini ang rason kun ngano nga sibaw kaayo karon ang panawagan sa mga local government units nga ibalik sa kampanya ang PNP. Apan kinahanglang dili tanang polis ang basta-basta lang nga makapahigayon og anti-illegal drugs operation aron dili kini maabusahan sama sa nahitabo kaniadto.

Pilion gyud unta kadtong mga tarong lang nga mga polis maoy tahasan sa kampanya kontra ilegal drugs ug higpitan usab ang pag-monitor kanila nga dili sila mangabuso ug matental nga mahimong drug protectors.

Angay usab magmatngon kining mga polis nga tahasan kontra illegal drugs nga dili sila makasala sa mga ordinaryong katawhan. Angay nilang hinumdoman nga tinuod man tuod daghan na ang mga kriminal, apan mas daghan ang mga inosente ug tarong sa palibot.

 Nakuha-kuhaan na ang mga badlungong polis, apan kinahanglang dili magpabaya ang publiko batok sa mga polis nga gustong moabuso pinaagi sa pagsumbong dayon aron dili sila modaghan.