Fire Prevention Month na
CEBU, Philippines - Buksan karong adlawa sa Bureau of Fire Protection (BFP) sa Dakbayan sa Mandaue ang mga kalihukan sa Fire Prevention Month pinaagi sa pagpagawas sa ilang mga fire trucks alang sa usa ka motorkada.
Si Senior Fire Officer 3 Arnold Lao nga maoy fire chief investigator nipahibawo nga sayo sa buntag himoon ang Walk for a Fire Free, Fire Safety Mission nga magsugod sa ilang fire station.
Ilang isunod ang pagpadagan sa fire truck sa motorkada nga pagahimoon nga salmutan sa mga fire trucks nga gipanag-iya sa nagkadaiyang establisemento sama sa San Miguel Corporation ug mga Barangay Volunteer Fire Brigades.
Naglakip sa mosalmot nga mokuyog sa nahisgutang motorkada mao ang Barangay Banilad Volunteer Fire Brigade, Barangay Tabok Volunteer Fire Brigade, Barangay Cubacub ug uban pa.
Si Lao niingon nga daghan pa nga kalihukan nga ilang pasiugdahan sa matag adlaw nga naglakip na niini ang fire Olympic ug fire awareness seminar nga pagahimoon sa nagkadaiyang kabarangayan sa dakbayan.
Gitataw ni Lao nga ang Fire Prevention Month karong tuiga nga nagdala sa tema nga, “Buhay at Ari-arian ay Pahalagahan, Ibayong Pag-iingat sa Sunog ay Simulan sa Pamamahay,” ang tapuson sa Marso 31. (BANAT NEWS)
Related video:
- Latest
