3 Drug rehab palambuon

CEBU, Philippines - Ang kagamhanan sa probinsiya gikatakdang mogama og kasabutan tali sa Philippine Mental Health Association (PMHA)-Cebu Chapter alang sa implementasyon sa community-based drug rehabilitation program alang sa mga drug surrenderer sa habagatan. Niining ulahi lang, ang hunta probinsiyal mihatag og pagtugot kang Gobernador Hilario Davide, III nga mogama og MOA tali sa chairperson sa PMHA nga si Glenda Basubas.

Si Bokal Christopher Baricuatro nagkanayon nga ang PMHA na-organisar kini niadtong tuig 1950 ug na-expanded kini ngadto sa walo ka chapter nationwide usa niini ang Cebu Chapter.

Ang PMHA-Cebu nag-promote sa advancement sa mental health pinaagi sa advocacy, edukasyon, prevention ug best practice interventions alang sa mga Pilipino. Nag-implementar sab kini sa three-fold program ubos sa Comprehensive Mental Health Intervention project. Matud ni Baricuatro nga ubos sa Local Government Code of 1991, ang probinsiya dunay obligasyon sa paghatag og basic services ug facilities.

Ang tumong sa maong mandato mao ang pag-promote sa mental health sa probinsiya pinaagi sa Community-Based Drug Rehabilitation sa PHMA-Cebu alang sa mga drug surrenderer sa habagatang bahin sa Sugbo. Ang probinsiya mohatag og P3 milyones sa PMHA isip funding assistance.

Dugang ni Baricuatro nga ang maong paghatag og pundo sa probinsiya isubay sa mga balaod sa Commission on Audit. (BANAT NEWS)