At last, pension hike

Seguro na ang usbaw sa atong pension. At least, ang unang P1,000 atong madawat sunod buwan, ug sa atong nadunggan, retroactive to January. Sa ato pa, P3,000 ang atong madawat nga usbaw.

Ang balance nga laing P1,000 nga usbaw, atong madawat either sa 2019, o sa 2020. Dugaydugay pa gyud ang atong paghulat, kay ilang seguroon nga dili mapiangan ang panudlanan sa SSS, kun kausahon ang paghatag niini ngadto sa kapin 2 milyones nga SSS retirees.

Ingon man, nagkinahanglan pa’g dugang pagtuon ang laraw pag-usbaw sa contribution sa karon nagtrabaho pa nga sakop sa SSS kay dili buot ang atong gobiyerno nga ang active pa nga mga sakop sa SSS maoy moabaga o motapak sa magasto sa pension hike sa mga retirees, pinaagi sa pag-usbaw sa ilang monthly contribution nga ibanon base sa sweldo.

Tulo ka butang ang gisugyot nga angay buhaton sa SSS aron dili maproblema ang panudlanan. Panghingusgan ang collection nga sa pagkakaron adunay giingon nga kapin sa P325 bilyones ang collectibles.

Unya, menosan ang ilang mga gasto, ilabi na ang dagko nga sweldo sa ilang mga opisyal, nga sumala sa COA nga sa tuig 2014 lang, mikabat og P117 milyones ang ilang nadawat nga sweldo ug allowances, ug kinahanglan nga ilang ipahiluna pag-ayo ang ilang mga investment aron seguro nga makaginansya.

Ug dugang niining P325 bilyones nga collectibles, adunay lain nga P8.168 bilyones nga unremitted employer’s contributions ug P61.226 bilyones nga aging unpaid loans. Ngano man ni? Mismanagement kay gisiguro lang sa mga opisyal sa SSS ang ilang mga dagkong sweldo ug allowances.

So, kun matarong lang ang pagdumala sa SSS, ug kunhoran og gamay ang ilang mga sweldo ug allowances, mahimo gyud nga madungan paghatag ang P2,000 nga usbaw, ug dili kinahanglang usbawan ang contribution sa non-retirees nga sakop sa SSS.

Ug dugang pa, aron kalikayan nga mabangkaruta ang SSS, katungdanan sa gobiyerno sa Pilipinas ang pagpangita’g paagi nga dili mahubsan ang panalapi niini. Usa sa ilang mahimo mao ang pag-subsidize sa SSS.

Sa 2015, ang subsidy nga gihatag sa atong gobiyerno ngadto sa 39 ka GOCC’s, kon government-owned and controlled corporations mikabat og kapin sa P78 bilyones. Zero ang SSS.

Ug nia pa, ang SSS, adunay 16 ka vice presidents; unom ka senior vice presidents; lima ka board members/commissioners; duha ka executive vice presidents; usa ka chairman of the board, ug usa ka president ug chief executive officer. Total number of executives, 31. Dili ba daghan ra ni?