Ang tinubdan sa kasakit (1)

Matud pa, dihang gilalang kita gikan sa gamhanan nga kahitas-an isip usa ka tawo, gisukip na Niya sa atong kaugalingon ang gahum, o ang birtud sa gitawag og ‘gugma’ nga dili makita sa atong lawas kay nakatago kini sa kinauyokan sa galamhan sa atong pagbati, nga gatubod diha sa nagpitik nga kasingkasing. Diwa kini sa atong tanlag.

Ang gugma, walay gisandigan ug wala sab kini magsalig sa uban nga porma o hulagway, kay gipalabi niini dili ang makita sa mata, kun dili, ang pagpamati sa gipitik sa gugma. Mao nga usahay, kumon na natong madungog nga kuno buta ang gugma. Apan sa nahigugma, nila pa, kun maoy agdon ang mga mata, may dakong posibilidad nga maganoy sa lingla sa nagpahipi nga salingkapaw.

Mao nga ang naglabi nga bation niini sa gugma, kanunay nga gitay-og sa kasakit, nagmaantuson sa pagpailob bisan sa grabe na nga kahapdos. Dili molunga nga maugtas sa paglahutay kay ang tiunay nga gugma, wa’y giila nga sukdanan sa pagsibog, bisan taliwala sa nagdagtum nga kangitngit, pugos kini nga iiwag ang hilabihang kahayag sa iyang paglaum.

 Apan adunay higayon nga grabe kining nagping-it sa kasakit, nga wala makasabot kun ngano. Apan usa lang kini ka tilimad-on nga ang kasingkasing dili makadawat sa kamatuoran nga mao ang kapakyasan sa gipangandoy nga kalipay. Dili tanang higayon maperpekto kita sa pangindahay nga gusto natong mahitabo niini nga kinabuhia.

Ang gugma nakaukit kini sa pagbati, dili mahimong langkaton aron isalikway, kay tipik o kabahin kini sa atong kinabuhi. Kun kini mawala man kanato, mahimong sa pamasin na lang kita monunot sa kawad-on ning kinabuhia. Wala na’y bulok ang kinabuhi, nga nawad-an og kusog nga mabuhi pa.