5 ka paagi sa pagkalimot

Kun mangunsulta si Presidente Rodrigo Duterte sa mga eksperto mahitungod sa iyang determinadong paningkamot sa pagkalimot sa makasaysayanon nga pagbarug sa katawhang Pilipinhon batok sa bangis nga diktadura, pagdaog batok sa mga sundawo ug ilang mga tangkeng iggugubat ug pagpalayas sa diktador gikan sa gahum, tudloan nila si Duterte sa lima ka labing epektibong paagi pagkalimot sa kagahapon.

Bisan unsay panghitabo sa kagahapon nga gusto nimo nga kalimtan, ipadayag ang imong gibati mahitungod sa panghitabo, maayo man o dili, aron hingpit nga makalimot. Mahimo nga may mga panghitabo sa imong kagahapon nga sakit, apan duna say mga makalipay.

Ang pagpabuhagay sa nagpuot nimo nga gibati, maayo man o dili, makatabang nimo sa pagkalimot sa kagahapon. Pakigsulti og higala o sakop sa pamilya sa imong gibati. Isuway og suwat ang imong gibati sa kagahapon (ayaw lang ipakita sa media). Mahimo gani nga suwatan ang nakapasakit nimo, (ayaw lang ipada!);

Ang padayong pagpangita og mabasol sa kagahapon makadaot sa imong karon. Inay tukion kinsa ang nakapasakit nimo (mga pari man o mga layko), pasayloa sila. Ang pagwiwi sa nangaging mga samad dili makadaot sa tawo nga nakapasakit nimo (labi na kun dugay na sila nga nangamatay) apan makapatanggong nimo sa kagahapon.

Kun maglisod gyud ka og kalimot sa kagahapon, paghunahuna og maayong mga butang sa karon. Kun maglisod gihapon, hunahunaa ang imong paboritong lugar sa imong bay (pananglitan, imong moskitero ug kan-anan) ug hinumdomi ang imong malipayong mga higayon sa maong dapit.

Palandunga ang hulagway sa imong kaugalingon nga moduso sa laksot nimo nga mga handumanan luyo sa pultahan ug kandadohi (o kun mas sayon alang nimo, isipa nga mga handumanan ang mga kriminal nga imong girakrakan). Dako og matabang ang paghatag og hulagway sa imong hunahuna, labi na sa pagpapas sa kinakusgan nga mga handumanan.

Kun mabalaka ka sa umaabot (sama sa pagtumaw sa dugang mga sakop sa Davao Death Squad ug pagtidlom sa popularidad) ug sa dili pa matental sa pagbalik sa kagahapon, pahinumdomi ang imong kaugalingon nga ang imong mausab mao ra ang karon.

Ilista ang mga butang sa karon nga imo pa nga mausab ug pangaliya kutob sa mahimo sa tanang nailhan nga mga anghel, nga dili pa uwahi ang tanan. ([email protected])