Nakipagtipan sa nobya utas sa karibal

COTABATO CITY, Maguindanao , Philippines  - Nauwi sa kamatayan ang masayang pakikipagtipan sa nobya ng 27-anyos na lalaki matapos itong pagbabarilin ng kanyang karibal sa bisinidad ng mall sa Kidapawan City, North Cotabato kamakalawa ng gabi. Dalawang tama ng bala ang tumapos sa buhay ng biktimang si Joven Mariano Aguanan ng Samal Island, Davao del Norte. Ayon sa police report, nakipagtipan lamang ang biktima sa kanyang nobya na si Jeseryl Malik ng Tulunan, North Cotabato. Gayunman, habang naglalakad ay biglang lumapit ang suspek at dalawang ulit na binaril ang biktima. Narekober sa crime scene ang dalawang basyo ng bala ang cal. 45 pistol habang sinisilip naman ng pulisya na karibal ng biktima ang suspek na hindi naman nakilala. ­