San Miguel andam na batok Ginebra
CEBU, Philippines - Taas ang kompiyansa sa San Miguel Beermen human masayri nga ang igsuon nilang koponan Barangay Ginebra Kings ang ilang ikaharong sa “best-of-seven” finals series sa PBA Philippine Cup nga sugdan ugma sa gabii didto sa Mall of Asia Arena.
Ang Beermen laraw nga manimawos sa Ginebra nga maoy mitagak kanila sa Governor’s Cup semifinals sa miaging season.
Ang duha ka koponan pulos miagi og kulbahinam nga Game-7 series, apan mas kondisyon ang San Miguel ilabi na nga gibutyag ni coach Leo Austria nga determinado ang tibuok koponan nga makuha ang makasaysayanong “three-peat” championship sa All-Filipino Cup.
Ang Fil-American point guard sa San Miguel nga si Chris Ross nagkanayon nga salig siya sa iyang koponan nga mokampiyon tungod sa mas taas nga championship experience.
Si Ross nga maoy league leader sa assist karon nga conference sa iyang 3.18 average dasig sab kaayo tungod sa powerhouse line-up nila itandi sa Ginebra. Lakip sa mga gisaligan ni Ross mao ang three-time MVP nga si JuneMar Fajardo uban ang mga season players nga sila si Arwind Santos ug Alex Cabagnot.
Sa ilang bahin, ang Ginebra midawat sa kamatuoran nga usa sila ka “underdog” sa maong serye ilabi na nga wala si Greg Slaughter, samtang dili pa siyento porsiyento ang kondisyon ni Joe Devance.
Apan si Ginebra legend Robert Jaworski miingon nga adunay dakung tsansa nga modaog ang Ginebra tungod sa kultura sa koponan nga “Never Say Die”. (BANAT NEWS)
- Latest