Makabungog nga kantidad nakayagaw sunod away ni Pacquiao

CEBU, Philippines - Wala pa’y  klaro hangtod  karon  kun kanus-a mobalik og away si Manny Pacquiao ug   asa sab kini mahitabo.

Unang gitorotot ni Top Rank chairman Bob Arum, ang promoter ni Pacquiao, nga ang Pinoy ring star gikatakda nga makigharong ni Jess Horn karong Abril 23 didto sa Brisbane, Australia.

Apan kalit lang kining nalubog human namahayag si Michael Koncz, ang Canadian adviser ni Pacquiao nga 100 percent siyang segurado nga ang eight-division world champion adto moaway sa United Arab Emirates.

Gidasonan kini ni Pacquiao nga mipahigayon pa gani og survey gamit ang Twitter diin nagpalaban siya sa  iyang mga followers kun kinsa iyang sunod kontrahon. Gawas ni Horn, mitumaw sab ang  ngan nilang Amir Khan, Kell Brook ug Terence Crawford.

Ning bag-o  lang, misamot og kayagaw ang tanan human gibandiwag sa usa ka mantalaan didto sa England nga nagkasinabot na sila si Pacquiao ug Khan nga magsangka ug lagmit adto kini ipahigayon didto sa United Kingdom.

Apan miulbo ang kaspa ni Arum kay wa’y igong basihan ang maong balita.

Ning nahitabo nga pagkayagaw sa sunod nga away ni Pacquiao, si Arum mipadayag nga makabungog nga kantidad nga gitanyag sa Dubai maoy hinungdan niini. (BANAT NEWS)