Inspirasyon ni Kiray?

CEBU, Philippines - Daghan ang mi-react sa  gidungog nga bag-ong inspirasyon ni Kiray Celis nga usa ka aktor ug fashion model. Si Kirst Viray ang ka-date ni Kiray niadtong Valentines Day kun diin miulbo usab ang hungihong nga inlove na sila sa usa’g- usa. Kasagarang post ni Kiray sa iyang social media accounts, gipahinungod kini alang kang Kirst.

Pangandoy ni Maja

Damgo ni Maja Salvador nga mahatagan og proyekto kauban ang beteranong aktor nga si John Llyod Cruz. Matud pa niya nga gusto niya nga masuwayan ang feeling nga maka-eksena ang usa ka John Lloyd. Positibo si Maja nga maabot ra ang adlaw nga matuman ang  iyang gipangandoy.

Wala’y suwerte

Nasagmuyo ang sexy model nga si Jinri Park sa dihang wala niya maabot ang iyang tinguha nga malakip sa Lucky 7 sa Pinoy Big Brother Lucky Season 7. Si Jinri ang nahimong latest evictee sa bahay ni Kuya niadtong Domingo. Matud pa niya nga wala na siya maghandom  nga mamahimong big winner gumikan kay nakita niya nga si Maymay Entrata ang mas angayan nga modaug sa kompetisyon apan sa pagkahibawo niya nga nausab ang criteria niini, gibati siya og kadismaya. “Since they were doing the whole Lucky 7 instead of the Big 4, I really wanted to be part of that”, suma pa ni Jinri.

Good friends ra

Gihatagan na og katin-awan ni Marc Abaya ang tinuod nga estado nila ni Alessandra de Rossi human miulbo ang espekulasyon nga matud pa aduna sila’y relasyon. Matud pa ni Marc nga magkauban sila sa trabaho ni Alessandra sa mga soap opera sa GMA kaniadto. “We’re very good friends. I’ve known her for a very long time” suma pa ni Marc.

Nakuyapan ra

Giklaro  ni John Regala nga wala siya gi-atake sa kasingkasing ug dili tinuod ang taho nga na-stroke siya. Matud pa niya nga nakuyapan lang siya niadtong tungura gumikan sa tumang kainit sa panahon. Suspetsa usab niya nga nahitabo katong maong insidente gumikan kay niubos ang iyang blood sugar tungod sa iyang sakit nga diabetes.

Gusto na ipa-ilaila

Dili na makahuwat ang aktor nga si Benjamin Alves nga personal nga ipaila-ila si Julie Ann San Jose ngadto sa iyang pamilya nga tua sa Guam. Suma pa niya nga hagbay ra unta niya napailaila si Julie Ann kung naa pa dinhi sa nasud ang iyang pamilya. Dugang pa niya nga updated ang iyang pamilya mahitungod sa mga panghitabo sa iyang kinabuhi.

Fan boy ni Joseph

Dili gihapon makatuo ang Kapamilya aktor nga si Vin Abrenica nga kauban na niya sa serye nga Wildflower ang iyang mga giidolong artista. Giangkon usab niya nga usa siya ka fan boy ni Joseph Marco kung diin niidolo siya niini, dili lang kay maayo kini nga aktor, gidayeg usab niya ang maayong  pagkahulma sa lawas niini.

Gipadad-an og gatas

Nagpasalamat si Rufa Mae Quinto ngadto kang Mariel Rodriguez Padilla human siya padalhi og breast milk alang sa iyang anak nga si Alaexandria tungod kay dili pa siya makapagawas og gatas sa iyang suso. Matud pa ni Rufa nga nakasugakod gyud tawon ang iyang anak ug hinanok kining nakatulog human kini makainom og gatas gikan ni Mariel.

GItubag ang basher

Gidepensahan ni Winwyn Marquez ang iyang hinigugma nga si Mark Herras human kini giingnan sa usa ka netizen nga wala kini gigasto sa ilang bakasyon didto sa Japan. Gi-akusahan usab kini nga gigamit lang siya aron mohumot og balik ang pangalan ni Mark sa industriya. Gitubag ni Winwyn ang usa ka basher nga dili tinuod ang gipangsulti niini batok kang Mark. “Yung sa sagot lahat sa trip na sinasabi mo, not all true. He organized this months ago. And Mark is known a bit and hindi niya kailangan gawin yun plus hindi ako superstar or star para magawa yun”, suma pa ni Winwyn.

Beteranong singers gihangop gihapon

Bisan pa man nga nagbaha ang mga bag-ong singers karong panahona, kusog gihapon ang suporta nga nadawat sa mga  OPM local artists ug usa sa sukdanan niini   mao  ang hukom  nga sublion ang  nagmalampuson  nila nga mga  Valentines show nga gidumogan sa bagang duot sa mga tawo.

Una nga gianunsyo nga balikon ang “Love Throwback 2” nga gipasundayag nila ni Hajji Alejandro, Ariel Rivera, Joey Generoso, Nina, Jinky Vidal ug Christian Bautista didto sa PICC Plenary Hall.

Ipasundayag usab pagbalik ang “Masquerade” concert nila  ni Concert King Martin Nievera ug Asia’s Nightingale Lani Misalucha. Matud pa nga daghan gyud ang nakauyon sa hits songs ug classic songs nga gidayeg  gyud sa audience. Mahitabo ang “Masquerade” repeat concert sa Solaire Grand Ballroom sa Marso 11.

Gikonsiderar nga sublion ang “Love In Motion” nga gipanguluhan ni Mr. Pure Energy Gary Valenciano. Suma pa sa mga fans nga nakasaksi sa maong pasundayag nga aduna gyu’y bag-ong timpla sa iyang mga awit  ang maong singer. (BANAT NEWS)