Orcullo gibiyaan kay late

CEBU, Philippines - Makig-istorya si Mayor Tomas Osmeña sa iyang gitudlo nga caretaker sa Barangay Ermita nga si Atty. Winifredo Orcullo subay sa pagkasuspenso sa mga barangay officials aron sa pagpangayo og kalambuan.

Naabot kang Mayor Osmeña ang nahitabo niadtong Martes diin wala mahinayon ang pakigtagbo ni Atty. Orcullo sa mga kawani sa maong barangay kay nanglakaw.

Si suspended Ermita Barangay Captain Felicisimo “Imok” Rupinta miklaro nga nisanong na ang mga empleyado niadtong Lunes nga ilang pakigtagbuan si Orcullo sa alas 9 sa buntag pagka Martes. Asoy ni Rupinta, wala pay alas 9 nagtapok na ang mga kawani apan giingong miabot na lang og alas 10 wala pa muabot si Orcullo hinungdan nga wala na kahuwat ang mga tawo ilabi na kadtong mga mi-duty pa pagkagabii.

Hinoon bukas gihapon ang mga kawani sa Brgy. Ermita nga makigtagbo kang Orcullo apan kinahanglan kun unsay schedule kini maoy sundon. Subay niini, matud ni ABC President Philip Zafra nga dili malikayan nga dili mosalig ang taga Ermita kang Orcullo sanglit tawo kini ni Osmeña, mao nga aron malikayan kini, mas maayo nga ang Department of Interior and Local Government maoy molingkod samtang nagpaabot pa kun kinsa ang itudlo ni Presidente Rodrigo Duterte isip OIC Barangay Captain.

Hinuon, isip ABC President iyang giawhag ang taga Ermita nga respetaran kun kinsa ang gibutang sa ilang barangay ug magtinabangay alang sa kaayohan. (BANAT NEWS)