Matinding padyakan inaasahan sa Le Tour

MANILA, Philippines - May 15 koponan kabilang ang dalawang dating kampeon ang magtatagisan para sa korona ng Le Tour de Filipinas na magsisimula sa Pebrero 18 sa Luzon.

Matinding bakbakan ang inaasahang masisilayan sa tinaguring “ama­zing edition” ng pamosong karera na siyang magpapasimula sa International Cycling Union Asia Tour season.

Pangungunahan ni Mark Galedo ang 7 Ele­ven Roadbike Philippines kung saan pakay nitong mabawi ang korona na kanyang napanalunan noong 2014.

Sasabak din si defen­ding champion Thomas Lebas ng France na siyang magmamando sa Kinan Cycling Team.

Apat na siklista lamang ang nasa listahan ng 7 Eleven Roadbike Philippines mula sa regular na limang miyembro sa bawat koponan.

Makakasama ni Galedo sina dating Asian Juniors road cycling bronze medalist Rustom Lim, RJ Peralta at Edgar Nieto ng Spain.

Aarangkada rin ang Philippine national team na gagabayan ni dating Olympian Bert Oconer.

Binubuo ang Pinoy squad nina George Oco­ner, John Renee Mier, Jerry Aquino Jr., Boots Ryan Cayubit at Mervin Corpus.

Lalahok rdn ang Team Ikyo (Japan), Bridgrestone Anchor Cycling Team (Japan), Oliver’s Real Food Racing (Australia), Terengganu Cycling Team (Malaysia), LX Pro Cycling Team (South Korea), Uzbekistan National Team, CCN Cycling Team (Laos), Keyi Look Sport Cycling Team (China), United Arab Emirates National Team, Attaque Team Gusto (Chinese Taipei) at Sapura Cycling Team (Malaysia).