CPADAO wa pay treatment program sa minors

CEBU, Philippines - Giangkon sa pangulo sa Cebu Provincial Anti-Drug Abuse Office (CPADAO), Carmen Remedios Durano-Meca, nga wala pa sila’y treatment program alang sa mga minor de edad nga tiggamitan og ilegal nga drugas.

Matud ni Meca nga ilang gi-focus karon ang kabahin sa community-based treatment program o diha sa kabarangayan hinungdan nga nakigtinabangay sila sa Department of Social Welfare and Development (DSWD) alang sa mga minors nga nisurender.

Sa kapin 51,000 nga drug surrenderers sa Probinsiya sa Sugbo gikan sa buwan sa Hulyo sa nilabay’ng tuig hangtud sa Enero 2, 2017, mokabat sa 3,000 niini mga minor de    edad. Ang CPADAO nagpahigayon og mga training ug seminar sa kabarangayan kabahin sa community-based treatment program.

Apan matud niya nga ang kabarangayan wala’y budget kabahin niini ug wala usab sila’y kalibutan kung asa sila mo-tap kung magpahigayon sila sa maong programa.

Dugang ni Meca nga buot nilang ma-institutionalized ang community-based treatment program tungod kay 70 porsiyento sa mga nisurender naa lang kini sa low ug mid-risk ug puwede kining dili lang masulod sa rehabilitation center ug ipaubos lang sa community-based treatment program.  – BANAT NEWS