Bulls giihaw sa Mavs

CEBU, Philippines - Krusyal nga tres sa nahabiling 11.8 segundos sa final period ang gipataroy ni  Dallas Mavericks forward Wesley Matthews   aron luwason ang koponan gikan  sa kulbahinam nga duwa batok sa Chicago Bulls, 99-98  kagahapon didto sa United Center sa Chicago, Illinois.

Ang daog maoy miguba sa ika-35 nga adlaw’ng natawhan sa Chicago star nga si Dwyane Wade.

Duna pa unta siya’y tsansa nga padag-on ang iyang team, apan si Wade nasipyat sa iyang itsa dayong kapupos sa oras hinungdan nga ang Bulls nahagba sa mga kamot sa Mavs sa ikaduhang higayon karon nga season.

Si Harrison Barnes miposte og 20 puntos, samtang sila si Seth Curry ug JJ Barea nagkumboya’g 30 puntos alang sa ikatulong sunod-sunod nga daog sa Mavs.

Sila si Matthews ug Deron Williams parehong mihipos og 11 puntos ug si Dirk Nowitzki adunay 10 puntos ug 10 sab ka rebounds nga diriyot mikolapso human nakalabaw og 13 puntos sa ikatulong kuwarter.

Si Jimmy Butler maoy nangu sa Bulls uban sa iyang 24 puntos, 12 ka assists ug siyam ka rebounds.

Didto sa San Antonio, si Kawhi Leonard mikadlit og 34 puntos sa 122-114 nga kadaugan sa Spurs batok sa  Minnesota Timberwolves.

Midugang si LaMarcus Aldridge og 29 puntos alang sa Spurs  nga migamit og 20-2 run aron paghimo sa 90-83 nilang alkanse ngadto na sa 103-92 nga labaw. Wala na molingi pa sukad niadto ang Spurs aron pag-inat sa ilang rekord ngadto sa 32-9 nga maoy ikaduhang labing nindot sa Western Conference sunod sa Golden State Warriors.

Sa laing aksiyon, si Cory Joseph maoy bida human kini mipabuhagay og career-high 33 puntos nga mituboy sa Toronto Raptors ngadto sa 119-109 nga kadaogan batok sa Brooklyn Nets.

Wala sab magpabitin ang Miami Heat nga nakasugakod sa laing “triple-double” ni James Harden aron pagdismantol sa Houston Rockets, 109-103.

Si James mipatuasik og 40 puntos uban ang 12 rebounds ug 10 ka assists sa ika-13 niyang triple-double karon nga season, apan naminghoy siya gumikan kay ang Rockets nasugamak sa Heat nga nagkupot sa ikaduhang labing bati nga 12-30 record sa liga karon nga season.

Misalida og maayo sa Heat si Goran Dragic uban sa iyang 21 puntos, walo ka rebounds ug walo sab ka assists. (BANAT NEWS)