Road mishap: 3 sundalo patay, 22 sugatan
MANILA, Philippines – Tatlong sundalo ang patay habang 22 pa ang malubhang nasugatan makaraang maaksidente ang kanilang military vehicle sa kahabaan ng Danag–Bilaan Road, Brgy. Upper Kamuntayan, Talipao, Sulu nitong Biyernes ng umaga.
Ayon kay Major Felimon Tan, spokesman ng AFP Western Mindanao Command, kasalukuyang lulan ang tropa ng Army’s 21st Infantry Battalion ng military vehicle na Isuzu forward truck na bumabagtas sa kahabaan ng nasabing lugar dakong alas-5:30 ng umaga nang mawalan ng preno.
Bunga nito, nawalan ng kontrol sa manibela ang driver hanggang sa mahulog sa kalsada ang behikulo na ikinasawi ng tatlo.
Patuloy na nilalapatan ng lunas sa Kuta Heneral Teodulfo Bautista Hospital ang mga nasugatang biktima.
Ayon kay Tan sa 22 nasugatan, 18 sa kanila ay inilipad kasama ang bangkay ng tatlong sundalo lulan ng C-130 helicopter patungong Zamboanga City para sa kaukulang medikasyon.
- Latest
