Seguridad sa mga tinun-an paninguhaon sa DepEd Talisay

CEBU, Philippines - Ihangad na lang sa langit ni Schools Division Superintendent Leah Noveras sa Department of Education (DepEd) sa dakbayan sa Talisay ang mga panghitabo unya sa Sinulog sa Kabataan karong adlaw nga Domingo.

Gibutyag ni Noveras nga nabalaka siya sa mga panghitabo sa nasud ilabi na sa seguridad sa katawhan.

Subay ang maong kabalaka ni Noveras sa nahitabong pagpamomba didto sa Hilongos, Leyte ug uban pang lugar sa niaging tuig diin ubay-ubay nga katawhan ang nangaangol.

Giangkon hinoon niini nga bisan pa man sa mga panghitabo, iyang gitagaan og kamanduan ang iyang mga magtutudlo nga gipangdestino sa mga contingent nga ubanan gyud ang mga kabataan sa bisan asang lugar.

Matud ni Noveras nga 126 ka magtutudlo ang iyang gi-assign sa contingents diin matag usa kanila molantaw og 10 ka tinun-an sa tanan nilang panginahanglanon.

Ang contingent sa Talisay muabot ngadto sa 600 ngadto sa 700 lakip na ang drum and bugle.

Gipasalig sa pangulo sa DepEd Talisay nga buhaton nila ang tanan aron lang maprotektahan ang ilang mga kabataan sa disgrasya.

"Ihangad lang gyud ni sa langit ang tanan kay anything can happen man gyud. Maningkamot lang gyud mi nga ma-safety ang mga bata basta lang within our control lang sad pud" nagkanayon si Noveras.

Sa laing bahin, nakigtagbo si Cebu City Mayor Tomas Osmeña sa Sinulog Board of Trustees alang sa dugang pagpangandam sa Sinulog 2017.

Hangtud karon wala gihapon mangimbitar og VIP ang mayor bisan si Presidente Rodrigo Duterte wala niya padad-i og imbitasyon.

Gipasabot hinoon sa mayor ang rason kun nganong iya kining gihimo tungod kay mas gusto niyang tutukan ang pagpatuman sa seguridad alang sa katawhan nga motambong sa maong kalihukan. (BANAT NEWS)