Ginang dedo sa nahulog na pera
MANILA, Philippines – Naging mitsa ng kamatayan ng isang ginang ang paghabol nito sa kanyang pera na nahulog habang sakay ng tricycle naganap sa kahabaan ng Molave Drive, Brgy. Guinhawa South, Tagaytay City.
Ang biktima na idineklarang dead-on-arrival sa ospital ay kinilalang si Jennalyn Rosauro, 31 may-asawa, ng Brgy. Guinhawa North, Tagaytay City.
Batay sa ulat,bago nangyari ang aksidente dakong alas-8:45 ng umaga ay sakay ang biktima kasama ang tatlong anak ng tricycle na minamaneho ni Wilfredo Torres, ng Purok 211 Brgy., Zambal, Tagaytay City.
Habang mabilis na bumabagtas ang tricycle ay aksidenteng nahulog ang pera ng biktima na hindi batid kung magkano.
Tinangka nitong kunin ang pera, subalit nahulog ito at nakaladkad ng tricycle na hindi namalayan ng driver kung hindi pa sinabi ng tatlong anak ng biktima.
Itinakbo ng driver ang biktima sa ospital, subalit idineklara itong dead-on- arrival.
Hindi na sinampahan ng kaso ang driver na nangakong sasagutin ang gastos sa pagpapalibing.
- Latest